星期二, 7月 25, 2017

慶祝打風

  根據特區香港天文台預測,本來不會懸掛八號風球,唔知點解一夜之間凌晨三時四十分改掛三號,早上九時二十分改掛八號,看來是星期日的關係,天文台或者認為掛一百號——如果有一百號的話——都無所謂,反正大部分人都不用返工。
  早餐後洗碗洗菜準備午餐晚飯的餸菜,打開米缸只剩幾斤米,整理好一切地都掃埋,換件衫落街糴米。去到超級市場人山人海,以為共產黨打到埋身,個個人屋企都無預備,所以立刻落街買齊所用日用品和食物,準備迎接颱風來臨。
  記得以前因為物資並沒有今天的富裕,運輸也沒有今天發達,每逢打風之後都會有三兩天沒有新鮮蔬菜和魚類肉類供應,那時大部分小家庭都會預備幾罐罐頭,以備不時之需。但係今時唔同往日,除了新界大陸供應,更有來自世界不同地方,包括以色列荷蘭——荷蘭蛋唔知算唔算——貨都有,打風後除了蔬菜稍貴,其他沒有影響。
  超級市場人山人海,還以前回到童年時渴望打風的日子,因為有罐頭食。想不到已經二十一世紀,打風去超級市場不是買罐頭,而是買杯麵、水餃、雲吞、蝦餃、燒賣、牛肉這些只要注入滾水或放入微波爐後即可食用的食物。
  以前只因物資匱乏才為打風作準備,多少有點苦中作樂,罐頭怎會比新鮮煮成的食物好吃。時代不同了,那四個多小時的八號風球裏,買些可食可唔食的杯麵水餃雲吞慶祝打風來臨,看來我們真係太平得太耐了,忘記了珍惜美好。

沒有留言: