祖屋

　　雖說是祖屋，但唔係第一代，更早之前，祖屋是一間平房，與幾間房屋組成，類似四合院，有前門與後門，中庭空地，有幾口水井，平日用水要從井打水上來，母親第一次學人打水，連個水桶也掉落，要用另一條帶鈎的繩釣上來。

　　他們習慣了，放水桶落至水面之上，搖兩下讓水桶口傾斜然後立刻放下，這樣便能打一桶水上來，看似容易打滿一桶就唔簡單，因為水連桶拉上來要花很大氣力，亦曾試過，只能拉上半桶水。

　　那時的房屋後欄多近水道，除了排水之外也用來洗滌衣服等，屋內除了大廳、灶房，約兩至三間睡房，灶房多設有柴房，當然沒有洗手間這回事，會設一處掛上圍布，內有馬桶，如果不習慣的話可以到附近的公共廁所，大多要走一段路。

　　改革開放之後舊房屋開始改建，主要唔一定係要起做兩層，而係主要加建洗手間，對於農村來說，衛生的改善生活能夠過得更愉快，而我們從城市而來，除了解決大小二便之外，更可以冬天不用冒着寒風拿盆熱水沖涼，那時雖未有熱水裝置，可是密封程度較佳，少了冷風電燈較亮地方夠大，舒服得多。

　　圖中的新屋，右面有煙囪為廚房，為何仍有煙囪？那時已開始有石油氣，但他們比較節儉，仍保持燒柴的習慣。中間為大廳，左面則為一間類似書房的房間，樓上兩間睡房，中間為樓梯。外表非常傳統，包括木窗框，牆上亦有算是花紋的裝飾。前面較長的草和小樹則為界線，內為自己外則是公眾地方或別家的範圍。

　　轉眼幾十年過去，這間祖屋也已清拆，大家都已搬上有電梯的樓房，從此鄉村也變成了他們所說的小區，居住環境的確如滄海桑田，頭上早已變得花白，有些事情卻又回到了從前。

又係VAR

　　唔記得係邊日比賽，因為已經好耐無睇足球，應是九月十二或十三日，曼聯對曼城，結果曼城以一比零勝曼聯，後來唔知咩VAR球證走出嚟道歉，話誤判了入球，但係曼聯始終都係輸了。

　　對於足球點解無乜興趣，又話VAR又話球證點點點，結果又係咁。先說明從來都唔係曼聯球迷，更唔係曼城，由始至終都係較為喜歡來自工人階層的城市，例如紐卡素，亦說唔上喜歡只係會留意，一些大球會和來自倫敦從來只係知佢哋好有錢。

　　點解後來喜歡睇英式欖球？足球唔係乒乓球，比賽時必定有身體接觸，但唔知點解足球經常會發生球員對峙甚至報復，但係欖球經常碰撞，球員對峙機會卻唔係咁多，但當要打起上嚟就會追住嚟打，刺激好多。

　　當倒地後畀人踢咗兩腳，報復踢對方一腳，本來好正常，紅牌亦合理，可是對方呢？好似無事發生過。好喇，當入了波如果再判唔入，咁會畀人批評曼聯何止打多一個甚至兩個，嚴重時可以係打多三四個甚至五六七八個（包括坐係冷氣房VAR嘅人），咁樣好似唔係幾好，於是判入。

　　事後道歉又改變不了賽果，賭波嘅連錢都收埋，都無你咁好氣。所以話要個VAR嚟做乜，反正都係錯，有與無其實無乜關係。

機械人

　　近日個個都講機械人，究竟機械人係咩呢？真係唔多清楚。

　　人類發明機械人，無非都係唔多願自己郁手，由機械來取代，例如唔想行路行咁遠，於是有了汽車，唔想掃地有了吸塵機，唔想洗衫自然有了洗衣機，機器和機械的發明，取代了人類勞動力的付出。

　　未有電力之前，能夠減輕勞力付出，大多利用物理原理來驅動，有了電力之後，更複雜的機器開始誕生，但是否一定要具備人型呢？看來應該唔使。

　　幫你掃地拖地煮飯收拾家頭細務，你會否選擇一個具備人型的機械來幫手？如果有得揀一定唔會要個人型機械人，因為嫌佢阻頭阻勢。

　　吸塵機地拖機電飯煲甚至自動煮餸的機械，根本無必要係「一個人」，亦無必要製造一個人型機械人，暫時到目前為止，人型機械人只想到其中一個用途。

　　現時自動化工廠內的組裝機器，算唔算係機械人？幾十年前當流水式生產線出現，由頭到尾唔見一個真人，全部都是機械手臂操作，那些又是否屬於機械人的一種？

　　Wallace & Gromit's這套英國黏土卡通劇集，內裏有最多異想天開的「機械人」操作諗頭，包括起床後立刻著好條褲，然後坐低食早餐，從烘多士搽果醬沖咖啡都唔使動一下，想落都幾先進，實行起來卻唔係咁簡單。

　　研究與發明當然重要亦唔容易，但如果個機械人只係跑來跑去跳高跳低，這些機械人只用來表演。

網上幾句話

　　踏入二十一世紀已經二十六年，但係唔敢相信今天仍好像以前，又機械人又AI，來來去去其實都係部電腦，當初稱為電腦已經足夠，如今係要加多幾個名稱，唯恐嚇你唔死。

　　於是上網，找來以下幾句，都係在網上看到的幾句：

在網上看到幾句：
全天下的騙子只有一個技倆
那就是編造輝煌的歷史
並許諾你精彩的未來
然後要你犧牲你的現在

Dolly Parton - I Will Always Love You

　　Dolly Parton二零二六年八月二十五日逝世，享年八十歲。

　　曾聽過Dolly Parton的歌，那時只知她個子不高，有一把大頭髮，報導中亦喜歡把焦點放在大胸，亦有說她嘴巴也大，不過話說回來，嘴大多數唱歌好聽。

　　那時聽她的歌，主要因為同時聽Eagles和Linda Ronstadt，學人聽美國的鄉村搖滾，所以亦有聽Dolly Parton。

　　其實唔多識咩嘢鄉村搖滴，只知無咁嘈，最主要喜歡的是歌手能夠自彈自唱，最好能夠作曲填詞，看着歌手演奏並唱，才有投入感。

　　這首《I Will Always Love You》後來成了電影《護花傾情》其中一首插曲，歌手Whitney Houston亦能大紅，那時主要喜歡電影中的男主角奇雲高士拿——雖然除了《與狼共舞》之外沒有看過太多，但包括這一部。

　　BBC新聞中「鄉村音樂女王Dolly Parton逝世：六首名曲訴說生命故事」除了報道逝世之消息，也說到六首名曲中的故事，其中《I Will Always Love You》：

　　儘管歌名聽起來充滿浪漫氣息，但這首1974年的歌曲其實是帕頓溫柔地請求自己的音樂導師波特·瓦格納（Porter Wagoner，波特·華格納、波特·韋格納）放手，讓她發展個人事業的心聲。

　　帕頓在21歲時加入瓦格納主持的綜藝電視節目。兩人推出了一連串對唱作品，並一同巡迴演出，令不少歌迷誤以為他們是一對戀人。

　　然而，兩人的關係其實相當複雜。帕頓後來在另一本著作《舞台之星：我的舞台人生》（Star of the Show: My Life on Stage）中寫道，她覺得瓦格納將自己的崛起視為一種「威脅」。

　　「當時我正在努力成為一名獨立藝人，而他早已是一位成名藝人。那是他的節目，但我也想在這個行業裡成長，並作為一名藝術家繼續發展自己。」

　　在這首歌中，她唱道：「苦樂參半的回憶／是我唯一帶走的東西。」（Bittersweet memories / That is all I'm taking with me）

　　音樂零售店Rough Trade網站文章曾形容這首歌「情感溫暖動人，但表達方式卻令人心碎」。

……

　　帕頓表示，她第一次在電台聽到這首磅礴抒情版本時感到震撼不已，甚至不得不把自己的凱迪拉克（Cadillac）汽車靠邊停下，以免發生意外。

　　她說，惠特尼·休斯頓把自己那首「小小的鄉村歌曲」，昇華成了「更加偉大的作品」。

　　現在看到這些關於歌曲背後再找來聽，又有另一個故事的聯想。

新聞：十種不應削皮蔬果

　　早上睇新聞，傳來一則「薯仔連皮吃可穩血糖？營養師盤點10種蔬果不應削皮 保留維他命／抗氧化物」。

　　稍有常識都知，的確有些蔬果可以連皮，但要唔要由營養師來講？

　　2021年12月11日大鄉里曾寫過一篇「食番薯」，講的就是番薯連皮這回事，同時也來自母親每次食番薯都會掛於口邊的一口話「世界饑餒番薯連皮」，何以連皮？因為食物少所以連皮都食埋。

　　到了今天為何人類對於某些蔬果不會再連皮呢？答案很簡單，皮雖然營養可能更豐富，但食唔一定只為溫飽，還有欣賞口感味道這回事。現在不是戰時。

　　首先，蘋果一定可以連皮，至於奇異果水蜜桃，如果唔怕皮影響了食慾，絕對可以食。薯仔番薯其實係可以連皮，焗薯就係連皮，焗烚番薯洗得乾淨係可以連皮，至於番薯糖水如果連皮，點有賣相！

　　很早已經聽聞西瓜皮可以煲湯，但係未見過有人煲，食到白色已經無味無道，仲花時間煲，除非太得閒。

　　橙皮檸檬皮都可以食，但你又食得幾多。香蕉皮食纖維鉀質，聽落好似幾好但能否消化？提子何止連皮有時連核都食埋，唔知對健康有無幫助？紅蘿蔔當然可以食皮，首先係要咀嚼有力。最後講到洋葱，自己食點會連皮，出街食的湯內就多數連皮。

　　能夠連皮食當然最好，問題係人類進化或退化至今，部分蔬果的皮能否消化並吸收，營養師當然亦唔知道，單睇營養價值當然如此，但真的連皮，看來又會出現另個問題，牙齒與腸胃頂唔順。

投訴

　　最近聽聞一宗投訴事件，話說有位巴士公司員工，在天水圍維持秩序時被人投訴。

　　投訴內容是甚麼呢？原來有位乘客從排隊的隊中走出來想要登車，可惜巴士已滿座未能接載，而這位乘客繼續站在隊伍前列並無返回隊中之意，巴士公司員工於是著這名乘客返回原來排隊位置，正因為這個原因，巴士公司接獲這宗投訴，投訴內容還包括巴士公司員工態度不佳等。

　　這宗投訴能否成立，稍有常識都知這名乘客有點無理取鬧，至於態度好與不好，本來也有標準，除非對着你講晒粗言穢語，否則亦無所謂態度好與不好這問題，因為工作人員着一位乘客排隊，可能只講一聲「唔該排隊」或「後面排隊」之類，或許態度唔夠親切也沒有請吧，所以才有投訴這回事。

　　曾經在銅鑼灣怡和街等候116回家，有位較為年輕的乘客係一定唔會排隊上車，未有車之時總站在隊伍前列，或上車之際突然衝過來打尖上車，當時係有巴士公司工作人員在現場，但卻不會理會，任由這位乘客打尖。

　　為何沒有人敢去阻止？大概因為無謂畀乘客投訴吧。

另一個角度

　　如果不是香港仔隧道巴士轉乘站落成，也不會走到這條天橋之上，從這個角度欣賞出入口的景色。

　　這條天橋本來就有，日常很少行人經過，主要為壽山村一帶的居民通往南風道，和香港仔隧道的職員使用。

　　因為多了個轉車站，天橋多了一個功能，把來往兩個巴士站連接起來，乘客亦可走到對面搭其他巴士。

　　望香港仔方向，海洋公園就在左面，把公園建於此，相信係班英國鬼想出來。

　　而向北方就是隧道出入口，這條屬於一號幹線就是連接香港仔至沙田的公路。

　　本來香港仔隧道在未有南港島線之前，經常交通擠塞，比正常行車時間要多了十五至三十分鐘，自從南線通車，算是有所改善，可惜時代變遷，禮讓也成了歷史。

薩莉亞

　　之前在利東街市買餸，經常見「Saizeriya」的招牌，從招牌上看，只知是一間意大利菜的餐廳，但從無諗過入內一試。

　　前幾天因為落雨，被迫在利東邨落車，皆因有瓦遮頭，亦可避一陣雨，站在騎樓底抬頭一看，又見Saizeriya的招牌。

　　這次終於入內一試，原來薩莉亞這間餐廳屬於日本的公司，2008年才在特區香港開店，以經濟意大利菜招徠。

　　以價錢睇，的確大眾化，$30-$40一碟意大利粉，約同樣價錢的薄餅，於是一樣一款點來試試，另加一款炸雞和水牛芝士配小番茄。

　　以價錢來評價，當然唔會希望水牛芝士能夠可以比較，小番茄是可以的。至於炸雞同麥當勞差唔多。披薩更加不能比較，薩莉亞餅底屬薄底。至於意大利粉，煮得比起很多有意粉供應的餐廳好多了，爽口而彈牙，味道符合快餐水準，下次可以繼續食意粉。

　　還有最重要一點，沒有加一這回事，比起大家樂大快活來說，起碼有較為舒適的座位與環境，不會有人坐在對面或鄰座，唔幫襯仲霸住位的街坊。

　　後記：來到薩莉亞，除了食之外，更要欣賞牆上的意大利景色，未必一定去過，但能近距離看着照片，亦心滿意足。

再生

　　facebook見十九才子寫九州地震與長崎原子彈轟炸紀念，寫到「不能不遙念那棵著名的樟樹」，想起五月在長崎所見這棵古樹。

　　日本侵略在先，結果受原子彈轟炸，最後投降，本來已經成了歷史，可是日本人懂得記念，例如島居炸剩半邊，也成了戰後標誌。

　　早年開始旅行，除了欣賞名山大川，也想找到如《弔古戰場文》中的情況，古戰場當然難找，但近代又如何呢，其實都係無，最終只有放棄。

　　唔係想睇戰場，而係想睇因戰爭所帶來的後果。

　　不過這都似乎屬於奢望，似乎應驗了禮失而求諸野。

說不出的快活——葛蘭

　　說不上認識或喜歡葛蘭唱的歌或演過的電影，而是也曾經聽過這首歌。

　　現在睇介紹，那時拍的電影與歌曲，比起今天真係超前，電影《野玫瑰之戀》以《卡門》為藍本，部分歌曲亦直接改自《卡門》，當時可以拍得出，今天唔使諗。

　　葛蘭唱歌與拍電影自己都未出世，所以根本唔認識。十幾歲出來學師，那時的師傅唔係從上海來港，就是師承上一代的較為年輕的師傅，幾乎大部分都係外省人，只不過在香港出生或在這裏長大。

　　那時從收音機播放一些國語歌，而每聽到葛蘭所唱的《說不出的快活》、《愛情是一隻自由的鳥兒》或是聽到同時期的歌曲，師傅們都會表現出興奮的情緒，有時更會手舞足蹈跟着一齊唱，特別是這首《說不出的快活》。至於點解，大概因為同聲同氣和有感而發——難得又聽一次。

　　那時聽歌唔容易，睇電影要睇荷包，買唱片唔使諗，幸好有電台，可是這裏是廣東人佔多，上世紀六十年代還有國語電影與歌曲，踏入七十年代已逐漸減少。

　　今天當然幸運得多，一首歌想幾時聽就幾時聽，睇戲亦可隨時睇，但令人留下回憶相信無幾多。沒有睇過葛蘭的電影，今天在youtube睇這首歌，那時的明星真係唔簡單，豪邁而奔放及帶點野性，難怪師傅們咁喜歡，回望上海的璀璨，似乎在這裏找到了歸宿，他們安享晚年去後又到另一批人往別處尋找了。

芍藥

　　自細唔多識花，劍蘭水仙玫瑰大概都知，至於牡丹和芍藥真係唔知點分，而梅花和桃花又係兩種不同的花，共通之處較為耐寒。

　　雖是同一個名字，可是中外有別，所以更加唔識分，買花時可以向檔主查詢，可惜講完一陣已經唔記得。加上近幾十年來人類把花的DNA變改，連不會出現在植物中的顏色甚至混色也有，把花改成純粹為人類裝飾而設。

　　對花可以唔認識，但係點都有幾樣嘢要知道，黃色的鬱金香比其他顏色耐看，如果沒有鬱金香，玫瑰亦是絕佳的選擇。

　　母親喜歡丁香，既較為廉宜就有一大束，開花也有康乃馨之茂盛，唔一定要貴，心意就可以了。

　　至於芍藥真係唔識，名字就聽過，於經過菜檔見有花出售，於是入內揀了兩朵，沒有問老闆這是甚麼花。

　　日本人喜歡花語，其實當中有些穿鑿附會，不過他們喜歡就是了，無謂太執着。

　　現時某地方很多蘭花出產，講靚唔覺反而有點俗，想起以前在露台的跳舞蘭，長長一串亦是所喜歡之一種。

　　開始時長長插在杯內，沒有太花心機打理，想不到開花時花瓣這麼豐富，白色中帶點神秘，要粉紅色來襯托，在晚上散發出燦爛，成了今年美好的回憶。

稱職

　　網上看了一篇文章，似乎替杜曹不值，文章名為「戰術板外的無形殺手：Thomas Tuchel 替補爭議與三獅軍團的系統性軟肋」，開首引言如下：

　　本文駁斥將英格蘭隊敗戰歸咎於教練的淺薄論點。文章直指病灶為球員領先時因「表現焦慮」而產生的「能量後撤」。根本解方是建立強韌的心理框架與高昂意圖，而非僅更迭戰術或教練。

　　一篇很學術的文章，有高深的論點，始終覺得作者不學無術。就如美國總統所說，（大意）搵哈利簡尼踢後衛有啲浪費，其實我識乜足球吖……

　　回到基本，今天的足球比賽，全是商業運作，觀眾買飛入場，可以有很多理由，首先喜歡偶像啦，或是喜歡的球隊。亦可以想睇一場精彩的比賽，由勢均力敵的對抗，看那一隊能戰勝對手，或一時大意，畀對方偷雞，贏錢贏波快樂一個晚上甚至講足一世，輸錢輸波無心機同樣都係幾日甚至三兩年，最多第二日早起再捱過。

　　至於球員或教練心理質素，以前或許會講西德球員心理質素好呀，南美足球多毛手毛腳，但觀眾會唔會理你咁多和關我咩事，仲要搵個理由替你——教練領隊球員——解釋？唔係卦！

　　現在乜都講戰術講團隊好似無個人一樣，其實即係盡信書不如無書，實際環境千變萬化，戰術係死嘅，當然唔係無用，但戰術係一早制定，亦絕對唔係只有一套，例如己隊領先一球後如何應變，領先兩球又如何，甚至領先三球又點，反過來輸一球兩球三球點面對呢，難道教練無想過？和波又點要踢十二碼又點，難道又係教練即興表演？

　　當入了波即改變戰術，其實唔係球員頂唔順，而係首先教練怕輸，球員在球場上未必能睇通大局，教練卻可以。就如導演一樣，拍片時每位演員未必知道套戲怎樣，但導演卻心中有數，連分鏡場面調度演員走位都要瞭如指掌，這才拍成一部電影。

　　還有今天所謂教練唔係得一個，而係成個團隊。當英格蘭能夠入波，即表示了這隊係可以再入波——連運氣也在你這邊，但係當換入守衛時，即表示了要保住戰果，前線球員是否清楚知道自己所要守住的位置呢？

　　太多學術名詞只為賣弄，如果教練團都無顧及球員心理，那麼這教練團也未有盡責，根本唔稱職。

奇雲基瑾逝世

　　早上打開新聞，傳來奇雲基瑾逝世的消息。

　　小時候未有電視，初時係偷睇隔離屋的「英國足球大賽」，印象中亦去過同學屋企睇，那時候由蘇文普主持，如果睇英文台，則由英國ITV一位十分英國人來主持，節目名稱《The Big Match》，而主題曲亦甚受歡迎。後來隨着改制，節目名亦有改變。

　　睇基瑾踢波的機會唔係咁多，那時候多數睇報紙或刊物，因為一個星期一次的《The Big Match》已經唔係成日有得睇，後來知道基瑾去了西德踢波，他是一位少數能在國外站穩腳而又踢出成績來的英國球員，唔係簡單。

　　再後來，他以領隊位置帶領紐卡素升上超級聯賽，可是教練生涯中最成功的時候。好可惜，以為以此經驗帶領國家隊，當然唔係咁容易，至於後來的曼城，那時已經很少睇波了。

　　喜歡基瑾有很多原因，大概他曾加入漢堡踢出成績，那時唔知係咪受林尚義影響，林尚義曾經在麗的電視或後來的亞洲電視逢星期日主持《德國足球大賽》，漸漸開始喜歡西德隊即德國足球，那種控球在腳，唔似英國包括蘇格蘭等好似田徑賽一般走上走落，所以較為留意來自英格蘭的基瑾。

　　再次執教紐卡素當然難再成功，這與潮流已經改變有關，唔一定乜都要講戰術，今天的所謂強隊，大多金錢實力雄厚，已非舊時那一套。

　　那些昔日美好的時代始終令人懷念，今天的足球很華麗，好像荷里活幾億元製作一樣，但偶然睇吓田徑賽個人突破與發揮，望能如流星一樣輕輕劃過，可惜已經唔會再有。

1970年世界盃

　　1970年世界盃四強賽義大利對西德，結果4:3。

　　FIFA精選了加時十分鐘片段，五十六年前的比賽，那時完全未見過可以全隊退守至禁區邊二十至三十碼的防守，能有這樣的戰術，大概只有在二十一世紀才會出現。

　　聽聞英格蘭領隊杜曹可以留任至2028年歐洲國家盃，咁就真係恭喜其他歐洲隊，因為少了一個對手。

　　換咩人唔重要，五個六個後衛都唔重要，既然打防守，點解兩個正前鋒唔換走呢？

　　聽人講話英格蘭球員經過多場大賽，體力已經回落，不足以撐起一百二十分鐘的比賽云云。

　　當真？職業球員不能打足一百二十分鐘的話，唔該減人工一係唔好做。你唔夠體力難道阿根廷係超人？人家就可以有無窮體力？

　　以前聽過「打斷門牙帶血吞」，真係技不如人麻煩認咗佢兼辭職即係自己走，作為觀眾真係唔收貨，雖然睇嘅係免費電視。

　　又話係娛樂事業，唔好咁上心嘅？

　　其實唔係上心，而係見佢哋吹得咁開心，只係想做回那位說破真相的小孩，講出佢無著衫啫。

求敗

　　2026世界盃，終於睇到大半場比賽，由英格賽對阿根廷，賽果英格蘭以1:2落敗，這似乎是他們所希望的結果。

　　自問不懂足球最新的賽例，亦已經無睇波好耐，大概都有十二至二十年，甚麼球星球員的名字，甚麼戰術大師鐵桶陣泊大巴全場緊迫都唔係好知係乜，雖說有時候其中某一隊有可能打多一個人，亦有可能兩個，因為已把對手其中一人趕了出場等。亦唔好理是否輸波而贏了錢，就算係娛樂都要盡力表演，可惜整場波唔見英格蘭有此決心，卻似乎一心求敗，這種心態不知從何而來。

　　講控球傳球，英國球員肯定不及阿根廷細膩，論速度阿根廷不會輸蝕，頭頂如何？你的確係高啲但唔一定頂贏，面對一樣高度還可以借力，矮過你隨時無從入手。唔講對手喇講自己，在自己的後半場傳來傳去而想贏波，這個世界有無咁嘅事，淘汰賽輸一球又係輸，輸十球都係輸，贏了一球以為贏，咁就真係恭喜喇。

　　幸好自從義大利十二年來無再打入決賽周，他們早早啋你都傻早早去了度假，所以再無特別喜歡的球隊。巴西已從森巴褪色，搵個義籍教練唔知想點，唔係話佢無辦法無能力，而作除了戰術亦要講個人突破與表演。西德早就不存在，大愛包容下係都要加入前東德球員，亦給曾贏得世界盃的領隊路維種下了禍根。義大利其實踢的並不一定是防守足球，當中有粗獷與細膩。法國隊嘛，唔係唔好，可惜唔多似係法國隊。近年西甲受歡迎，那種豪邁作風與打不死的精神的確值得學習。阿根廷當然在前列，唔多鍾意就係唔鍾意無得解釋。挪威比利時塞爾維亞克羅地亞波蘭捷克斯諾伐克等都有好球員，贏固然可喜輸又會認命。

　　翻睇以前的對賽youtube片，1982年世界盃四強賽西德對法國，加時十二碼西德以5:4勝出。當法國贏到3:1時，從無龜縮，雖然最終輸了都唔係咁難睇。是屆世界盃最終由義大利勝西德3:1。

　　自細喜歡陰謀論，搵個德國人來教英格蘭？佢哋係世仇嚟，靠唔靠得住呀！

睇唔到

　　睇唔到當然唔係球證睇唔到或VAR睇唔到，亦有可能睇到都話睇唔到，但真正睇唔到係以一個星期至十日起一層的話，過多兩三個星期，再睇唔到內部的起樓情況。

　　以預製組件起樓當然係快，可惜單幢樓唔係咁容易這樣興建，不過他們自然有最新的方法，包括部分預製件，而石屎板亦係由組合件組成，當這層落好石屎，立刻拆去預製石屎板，從下一層運往上層，跟着再組裝起來，因為這時每一層的面積與設計基本上都一樣，再無必要逐樓釘一次，使用組裝石屎板方便得多。

　　看着一座大廈由拆樓至興建，施工時會產生噪音，不過這也必須接受，看着工人大概由早上七時許開工，直至下午五點六點才收工，工時唔係短亦要受着日曬雨淋，的確唔簡單

　　將來建成的模樣如何暫未知道，暫時放下對這個地盤的記綠留，待完工再留意了。

爭議

　　足球比賽或說任何職業體育賽事都是娛樂事業，那麼球證的判決爭議自然也是表演內容的一部分。

　　以這屆世界盃埃及與阿根廷的比賽中，以球迷角度看，阿根廷表現了高質素的反擊，最終奪得了勝利，相信沒有人會懷疑，亦相信沒有人真的相信埃及能贏得這場比賽。

　　爭議從來都有，足球比較複雜，不像網球羽毛球排球隔住個網，出界就是出界，你可以上訴，但電眼判決成最終結果。未有鷹眼之時，例如麥根萊很喜歡爭拗，其實那些都是場上表演的其中一節。

　　其實很多球員都唔多喜歡爭拗，球證話係咁就係咁，最多發泄吓就算，但觀眾可不這樣想。

　　出界入界較容易判斷，但睇唔睇VAR由同樣由人來決定，喜歡就睇唔喜歡話之你，雖說使用VAR有規定，同樣規定也由人來定，到底誰是最終決定呢？

　　例如法庭判決，殺人分蓄意與無意，即有上訴機制，在足球賽事中的犯規動作，是否也應分為蓄意與無意呢？埃及球員踏中阿根廷球員的腳面，從照片看並非蓄意，至於身體接觸更難判斷，可是無論越位之裁決，VAR只給觀眾一張圖片，是之前或之後觀眾無可能知道，我們只有相信。

　　無人會認為賽果內定，觀眾只希望欣賞一場精彩而對抗的比賽——不似法國對巴拉圭，技不如人心理質素差自然落敗，連那位現今為國際足協球證委員會主席的皮耶路易吉·科利納（Pierluigi Collina，當年他做球證亦唔見太好，這是後話）也發表了「FIFA Issue Statement on Argentina 3-2 Egypt Decisions After 'Rigged' Claims」（見這篇新聞），最後說到：「“Of course, there will always be an element of subjectivity in some decisions,” Collina concluded, “but we are happy with how this principle has been applied throughout the tournament.”」（“當然，有些決定總是帶有主觀性，”科利納總結道，“但我們對這一原則在整個賽事中的應用感到滿意。”由Google翻譯）來作結。

　　無錯，任何決定都帶有主觀成分，這就是娛樂所帶來的喜怒哀樂，而埃及雖然輸了波，不過肯定有人贏了大錢。

　　youtube上2002世界盃南韓2:1勝意大利，那年意大利根本就踢得唔好，結果優勝劣敗。這場波當然亦會把責任推給球證。其實無論VAR或在場上的球證，容易發生爭權與弄權，也許難以避免，而今天的VAR有時頗浪費時間。至於韓國足球隊嘛，輸波有甚麼大不了呢。

　　賽果有無內定唔敢講，雖是娛樂亦希望好睇，以高普為例，那幾年的利物浦（非利物浦球迷）唔算太高質，但係有永不言敗的精神，正是觀眾所樂見。

講足球

　　寫這篇日記剛看了世界盃十六強淘汰賽埃及敗給阿根廷2:3，結論還是一樣，輸波唔緊要，贏錢就可以了。

　　凡是職業賽事都是娛樂事業的一部分，千萬不要投入太多感情，只不過世界盃來到最後以國家為出師之名，那些熱昏的頭腦的愛國者才突然間愛國。

　　唔好睇得甚麼國際足球總會，甚麼歐洲足球總會聯盟，甚麼國際奧林匹克委員會咁神聖，搞比賽主要目的都是為娛樂和賺錢，無錢搵的話搵鬼來做。

　　好似世界盃，決賽週為何增至四十八隊（下一屆更有機會增加至六十四隊）？上一屆為何給卡達主辦？又點解要改到十二月舉行？點解無人問呢？

　　但係個離晒普叫領了紅牌的球員暫緩執行停賽，那位主席立刻應承，無人會覺得離晒普合理，但個主席卻無人追問，莫非唔關自己事所以唔問？

　　離晒普其實是那個說出國王無著衫的小孩，而且比那位小孩更頑皮，會把我們心中唔敢講的那句都會講埋出嚟，例如賽果造馬等。例如埃及射入的「詐糊」，如果真的犯規在先，為何球證唔早早吹罰？唔好話畀我聽球證（包括VAR，VAR根本就是垃圾）很公平，萬一真的決賽由摩格哥對埃及，仲點會有人願意捱夜睇波？到時係個個叫回水。

　　講咁多都係廢話，雖然直至今日（七月八日）為止無睇過一場世界盃，不過對於比利時、挪威有些少好感，本來還有日本，可惜輸給了巴西，還是那一句，落到場唔想贏咁踢嚟做乜！

扮做

　　找到舊同事送的充電池，外型由一輛已經消失的新世界巴士及巴士站組成，新巴巴士城巴巴士站，唔知邊個設計。

　　兩間巴士公司好像已經合併了三年，但係服務唔見有乜改善，削減路線當然有，削減服務班次更加，合併唔見好，皆因相信班高層個個都係扮做。

　　在facebook睇到十九才子講英國政壇，那位準備爭做首相的「賓含」（佢係咁譯）其中一段寫道：

　　『凡做個老闆的都知道，沒有本事的人，一上位就喜歡Change。因為缺乏substance，「改變」只限形式，必搶先裝修辦公室、傢俬改這樣改那樣，改新look，換新裝，先花一筆巨款。世界上所有的智商低端人口及城市，行為都一樣。』

　　其實有邊個唔係，好似新巴城巴合併，首先做唔係改善服務，而係改個站牌，改顏色，改字型大小，編號由四個數字改為五個等，這些都唔係必要，都係做又得唔做又得嘅事，但係點解新官上場一定要做呢？

　　皆因扮做。

　　難為了乘客，城巴點會仲有好服務！