英劇：Inspector George Gently

　　BBC one一套劇集Inspector George Gently已於2017年10月30日播出第八季最後一集，代表整套Inspector George Gently已完結。

　　Gently有時會會畀人問，當一切努力都是白費時，他有時都唔知點答。

　　他有自己努力的方向，未必找到答案與結果，但他都會朝着這個方向而行，不會受周圍的環境所影響，而最終的結局可以講唔係咁悲觀，而係睇如何繼續和有沒有這個心，得把口係無用，做才最實際。

　　由第一季第一集開始，就係Gently的太太被車撞死，本想退休，但調職至紐卡素附近而又有所發現，逐漸發展以後的案件。第一季頭幾集改編自小說。

　　一老一嫩的拍檔，劇集中常見，後生永遠都係較為急進，說話不留情面甚至挖苦，十足一個英國仔，二人之間的對答才是精彩所在。好言相勸多數都唔會聽，因為時間永遠站在自己那一邊，但當失去時才知那段日子之可貴。

　　年輕警探John Bacchus（Lee Ingleby飾）最後也升為Inspector，後來也多了一位女警，故事背景為六十年代中期至踏入七十年代，那時煙不離手，飲酒收錢講吓有味笑話，劇集攝製於2007-2017年間，由BBC one播出，想唔到以BBC咁左，在踏入二十一世紀可以容許劇集有咁多上世紀六七十年代的影子，似乎那時候英國仍有那種舊有的方法，以今天的標準想講一段玩笑也不能，這也許解釋了為何英國還這麼喜歡製作上世紀六十七十代為背景的電影或電視劇。

　　現在網上仍有得收睇，不過要付費。

又係VAR

　　唔記得係邊日比賽，因為已經好耐無睇足球，應是九月十二或十三日，曼聯對曼城，結果曼城以一比零勝曼聯，後來唔知咩VAR球證走出嚟道歉，話誤判了入球，但係曼聯始終都係輸了。

　　對於足球點解無乜興趣，又話VAR又話球證點點點，結果又係咁。先說明從來都唔係曼聯球迷，更唔係曼城，由始至終都係較為喜歡來自工人階層的城市，例如紐卡素，亦說唔上喜歡只係會留意，一些大球會和來自倫敦從來只係知佢哋好有錢。

　　點解後來喜歡睇英式欖球？足球唔係乒乓球，比賽時必定有身體接觸，但唔知點解足球經常會發生球員對峙甚至報復，但係欖球經常碰撞，球員對峙機會卻唔係咁多，但當要打起上嚟就會追住嚟打，刺激好多。

　　當倒地後畀人踢咗兩腳，報復踢對方一腳，本來好正常，紅牌亦合理，可是對方呢？好似無事發生過。好喇，當入了波如果再判唔入，咁會畀人批評曼聯何止打多一個甚至兩個，嚴重時可以係打多三四個甚至五六七八個（包括坐係冷氣房VAR嘅人），咁樣好似唔係幾好，於是判入。

　　事後道歉又改變不了賽果，賭波嘅連錢都收埋，都無你咁好氣。所以話要個VAR嚟做乜，反正都係錯，有與無其實無乜關係。

機械人

　　近日個個都講機械人，究竟機械人係咩呢？真係唔多清楚。

　　人類發明機械人，無非都係唔多願自己郁手，由機械來取代，例如唔想行路行咁遠，於是有了汽車，唔想掃地有了吸塵機，唔想洗衫自然有了洗衣機，機器和機械的發明，取代了人類勞動力的付出。

　　未有電力之前，能夠減輕勞力付出，大多利用物理原理來驅動，有了電力之後，更複雜的機器開始誕生，但是否一定要具備人型呢？看來應該唔使。

　　幫你掃地拖地煮飯收拾家頭細務，你會否選擇一個具備人型的機械來幫手？如果有得揀一定唔會要個人型機械人，因為嫌佢阻頭阻勢。

　　吸塵機地拖機電飯煲甚至自動煮餸的機械，根本無必要係「一個人」，亦無必要製造一個人型機械人，暫時到目前為止，人型機械人只想到其中一個用途。

　　現時自動化工廠內的組裝機器，算唔算係機械人？幾十年前當流水式生產線出現，由頭到尾唔見一個真人，全部都是機械手臂操作，那些又是否屬於機械人的一種？

　　Wallace & Gromit's這套英國黏土卡通劇集，內裏有最多異想天開的「機械人」操作諗頭，包括起床後立刻著好條褲，然後坐低食早餐，從烘多士搽果醬沖咖啡都唔使動一下，想落都幾先進，實行起來卻唔係咁簡單。

　　研究與發明當然重要亦唔容易，但如果個機械人只係跑來跑去跳高跳低，這些機械人只用來表演。

Dirty Business

　　有機會在英國Channel 4睇了一套半紀錄片《Dirty Business》，內容講述污水處理廠初時因為出現故障，未能處理污水，結果污水池滿溢，造成污水直接排放在河道，而未經處理的污水也直接排出大海，引致污染。

　　這些事情本來偶有發生，後來愈加嚴重，未經處理的污水經常因為各種原因而直接排出，導致河道海洋污染，河中生物大量死亡，原本清澈的河水變得污濁，可是監管機構卻未能有效監管。

　　最可笑的地方莫如監管機構為了減少支出，引入「自我申報」機制，即有事發生才由供水和污水處理機構向上報告，這個結果係人都知不能有效監管，自我申報即係唔報。

　　終於居民覺得唔妥，開始調查事件，從中看到官僚的運作，高高在上的態度，以及愛理不理，把市民愚弄成了高層的日常。

　　這套《Dirty Business》，除了看到英國政府的無能與懶惰，還有精英管理階層的傲慢，受苦自然屬於在他們眼中的人礦。

　　本來手中有選票已經比無好得多，不幸的是踏入二十一世紀，當有機會向上爬之際，容易迷失方向，漸漸也會變成和他們一樣，因為這個世界已經沒有了信仰。

　　劇中最後說到弄成今天的局面，因為早在上世紀七八十年戴卓爾夫人把一切公共事業私有化的結果，這有點過於簡單化，這是另一個話題了。

神似

　　網上睇劇，除了劇情，現在多了時間留意其他，包括這一小段。

　　日本人導演韓國人編劇，未必能夠完全滿意，劇情需要之外，導演編劇會加入其他元素，增加娛樂。

　　怎樣才能拍出一個人夠賤，港產片很多，張耀揚做唔少，可惜無乜睇過，日本人拍呢則有日本風格，港產片唔會再有，日本卻能繼續。

　　其實開始時這位警探畀黑幫用槍指住個頭，但他毫無畏懼，還一手撥開，能夠咁串當然身懷絕技啦。

　　至於這位正義警探最終竟然死於自己手上，何解？周身武器用極唔完，當個個人都唔夠佢打，巧合嘅事情出現又唔係企係你嗰邊，結果出事。

　　都叫咗你唔好做多餘嘅事，講極都唔聽。

稱職

　　網上看了一篇文章，似乎替杜曹不值，文章名為「戰術板外的無形殺手：Thomas Tuchel 替補爭議與三獅軍團的系統性軟肋」，開首引言如下：

　　本文駁斥將英格蘭隊敗戰歸咎於教練的淺薄論點。文章直指病灶為球員領先時因「表現焦慮」而產生的「能量後撤」。根本解方是建立強韌的心理框架與高昂意圖，而非僅更迭戰術或教練。

　　一篇很學術的文章，有高深的論點，始終覺得作者不學無術。就如美國總統所說，（大意）搵哈利簡尼踢後衛有啲浪費，其實我識乜足球吖……

　　回到基本，今天的足球比賽，全是商業運作，觀眾買飛入場，可以有很多理由，首先喜歡偶像啦，或是喜歡的球隊。亦可以想睇一場精彩的比賽，由勢均力敵的對抗，看那一隊能戰勝對手，或一時大意，畀對方偷雞，贏錢贏波快樂一個晚上甚至講足一世，輸錢輸波無心機同樣都係幾日甚至三兩年，最多第二日早起再捱過。

　　至於球員或教練心理質素，以前或許會講西德球員心理質素好呀，南美足球多毛手毛腳，但觀眾會唔會理你咁多和關我咩事，仲要搵個理由替你——教練領隊球員——解釋？唔係卦！

　　現在乜都講戰術講團隊好似無個人一樣，其實即係盡信書不如無書，實際環境千變萬化，戰術係死嘅，當然唔係無用，但戰術係一早制定，亦絕對唔係只有一套，例如己隊領先一球後如何應變，領先兩球又如何，甚至領先三球又點，反過來輸一球兩球三球點面對呢，難道教練無想過？和波又點要踢十二碼又點，難道又係教練即興表演？

　　當入了波即改變戰術，其實唔係球員頂唔順，而係首先教練怕輸，球員在球場上未必能睇通大局，教練卻可以。就如導演一樣，拍片時每位演員未必知道套戲怎樣，但導演卻心中有數，連分鏡場面調度演員走位都要瞭如指掌，這才拍成一部電影。

　　還有今天所謂教練唔係得一個，而係成個團隊。當英格蘭能夠入波，即表示了這隊係可以再入波——連運氣也在你這邊，但係當換入守衛時，即表示了要保住戰果，前線球員是否清楚知道自己所要守住的位置呢？

　　太多學術名詞只為賣弄，如果教練團都無顧及球員心理，那麼這教練團也未有盡責，根本唔稱職。

奇雲基瑾逝世

　　早上打開新聞，傳來奇雲基瑾逝世的消息。

　　小時候未有電視，初時係偷睇隔離屋的「英國足球大賽」，印象中亦去過同學屋企睇，那時候由蘇文普主持，如果睇英文台，則由英國ITV一位十分英國人來主持，節目名稱《The Big Match》，而主題曲亦甚受歡迎。後來隨着改制，節目名亦有改變。

　　睇基瑾踢波的機會唔係咁多，那時候多數睇報紙或刊物，因為一個星期一次的《The Big Match》已經唔係成日有得睇，後來知道基瑾去了西德踢波，他是一位少數能在國外站穩腳而又踢出成績來的英國球員，唔係簡單。

　　再後來，他以領隊位置帶領紐卡素升上超級聯賽，可是教練生涯中最成功的時候。好可惜，以為以此經驗帶領國家隊，當然唔係咁容易，至於後來的曼城，那時已經很少睇波了。

　　喜歡基瑾有很多原因，大概他曾加入漢堡踢出成績，那時唔知係咪受林尚義影響，林尚義曾經在麗的電視或後來的亞洲電視逢星期日主持《德國足球大賽》，漸漸開始喜歡西德隊即德國足球，那種控球在腳，唔似英國包括蘇格蘭等好似田徑賽一般走上走落，所以較為留意來自英格蘭的基瑾。

　　再次執教紐卡素當然難再成功，這與潮流已經改變有關，唔一定乜都要講戰術，今天的所謂強隊，大多金錢實力雄厚，已非舊時那一套。

　　那些昔日美好的時代始終令人懷念，今天的足球很華麗，好像荷里活幾億元製作一樣，但偶然睇吓田徑賽個人突破與發揮，望能如流星一樣輕輕劃過，可惜已經唔會再有。

求敗

　　2026世界盃，終於睇到大半場比賽，由英格賽對阿根廷，賽果英格蘭以1:2落敗，這似乎是他們所希望的結果。

　　自問不懂足球最新的賽例，亦已經無睇波好耐，大概都有十二至二十年，甚麼球星球員的名字，甚麼戰術大師鐵桶陣泊大巴全場緊迫都唔係好知係乜，雖說有時候其中某一隊有可能打多一個人，亦有可能兩個，因為已把對手其中一人趕了出場等。亦唔好理是否輸波而贏了錢，就算係娛樂都要盡力表演，可惜整場波唔見英格蘭有此決心，卻似乎一心求敗，這種心態不知從何而來。

　　講控球傳球，英國球員肯定不及阿根廷細膩，論速度阿根廷不會輸蝕，頭頂如何？你的確係高啲但唔一定頂贏，面對一樣高度還可以借力，矮過你隨時無從入手。唔講對手喇講自己，在自己的後半場傳來傳去而想贏波，這個世界有無咁嘅事，淘汰賽輸一球又係輸，輸十球都係輸，贏了一球以為贏，咁就真係恭喜喇。

　　幸好自從義大利十二年來無再打入決賽周，他們早早啋你都傻早早去了度假，所以再無特別喜歡的球隊。巴西已從森巴褪色，搵個義籍教練唔知想點，唔係話佢無辦法無能力，而作除了戰術亦要講個人突破與表演。西德早就不存在，大愛包容下係都要加入前東德球員，亦給曾贏得世界盃的領隊路維種下了禍根。義大利其實踢的並不一定是防守足球，當中有粗獷與細膩。法國隊嘛，唔係唔好，可惜唔多似係法國隊。近年西甲受歡迎，那種豪邁作風與打不死的精神的確值得學習。阿根廷當然在前列，唔多鍾意就係唔鍾意無得解釋。挪威比利時塞爾維亞克羅地亞波蘭捷克斯諾伐克等都有好球員，贏固然可喜輸又會認命。

　　翻睇以前的對賽youtube片，1982年世界盃四強賽西德對法國，加時十二碼西德以5:4勝出。當法國贏到3:1時，從無龜縮，雖然最終輸了都唔係咁難睇。是屆世界盃最終由義大利勝西德3:1。

　　自細喜歡陰謀論，搵個德國人來教英格蘭？佢哋係世仇嚟，靠唔靠得住呀！

世界盃附加賽

　　這段影片只能在youtube上觀看，亦唔知Now過得三幾個月會否取消，影片內容是2026世界盃歐洲區附加賽波期尼亞對意大利，終場一比一，加時維持比數，由十二碼決定誰入圍，結果波斯尼亞四比一勝出，入圍世界盃決賽周。

　　自從林尚義退休及仙遊後，再加上賭波風氣，波經好似馬經，對足球興趣大減，今年世界盃在何時舉行也不知，大概知道由美國、墨西哥、加拿大聯合舉辦。

　　現時歐洲各國的聯賽競爭激烈，球員身價又高，既有歐聯又有歐國盃，亞洲區大概只有日本南韓陪襯，非洲有國家盃，南美亦有自己的世界，而且世界盃舉行期間又是歐洲各大聯賽的暑假，增加至四十八隊目的為增加收入——當然包括賭注在內，並無提高足球水準，VAR近乎笑話，包括觀眾欣賞水平，實在看不出為何再要花時間捱夜睇波。

　　由初賽踢幾十場，到頭來踢多一場淘汰賽，有時都覺得多餘，不如場場都係淘汰賽，緊張氣氛或會高一點。而那班高薪的球員，究竟有沒有興趣為了國家這個榮譽而又好積極呢？有時難免有些懷疑。

　　加上體育運動已經職業化，由選人至訓練，之後宣傳捧高弄低等，已經成一盤大生意，你有你爭標我有我買賣，同樣可以搵錢，贏了冠軍滿足了國民的虛榮心，我們只不過如螻蟻任操弄。

　　早年意大利出局決賽周，那時已開玩笑說意大利人最醒，世界盃有乜好踢，不如早啲休息去渡假，更不會受傷，世界盃還是留給想一踢成名的年輕球員吧。

　　近年德國唔見好，英國最想贏，法國隊當中究竟有幾多個係法國人，巴西和阿根廷的球員最明白搵錢的道理，非洲有好球員。無論怎樣亦不理官僚當中的黑暗，把世界盃當作一個派對，亦是一個熱鬧的節目。

輸波賴守門員

　　本來輸波應該賴地硬，但想不到道竟然賴個守門員。

　　幾個星期前歐聯十六強首回合，由馬德里體育會對熱刺，結果熱刺大敗2比5，於開賽十五分鐘連失三球，熱刺領隊在十七分鐘決定換走守門員堅士基，可惜最後仍慘敗，這個結果是否真的與守門員有關？

　　youtube上的精華片段，無疑失第一球及第三球，守門員要負責，但失第二球時，見守衛同樣滑倒未能解圍才失波，從這裏看來，熱刺球員似乎未能適應馬德里體育會的場地，引致滑倒及誤判球速，才導致失波。

　　其實最唔明係為何在這等大賽中派一個後備守門員？莫非正選受傷？但睇落唔係，換人時又換回正選，咁即係根本無想過場波係點踢，只係隨機應變。

　　後來前曼聯門將舒米高批評熱刺領隊換人決定，見「後備門將擔正17分鐘被換 熱刺主帥遭批毀人前途」，之後有無人記得唔清楚，失波有時並不一定係守門員負全責，後衛呢，中場呢甚至前鋒呢？

　　話說回來，輸波當然要搵個替死鬼，唔通話自己無領導能力咩，你係領隊，賽前部署中段變化輸波點踢贏波點保持和波又點，難道在場上才知道？

　　說起熱刺，荷度在熱刺當打時曾留意過，後來因為開始了足球賭博，已經再沒有以前般留意足球了。

Slow Horses - Season 5

　　Slow Horses第五季去年九月播出，保持一貫水準，期待着第六季。

　　特務電影或電視劇好睇之處，就是一齊搵出真相，可惜所謂真相唔係你所想，內裏自有規律，個人只不過是整個組織的一口螺絲釘，甚至不如。

　　口中漫不經意說着別人的故事，傷心記憶埋藏在最深處，激情過後只想找到一片不變的寂靜地，看着塵世間的虛假變化。

　　最後一集有這樣的對白，英國人講嘢係有啲唔同：

　　「it's not the hope that kills you, it's knowing it's the hope that kills you, that kills you.」（「真正要命的不是「希望」，而是你明知道『希望讓人心碎』卻仍然抱着希望，這才要命。」）

北海道列車貨車相撞

　　寫緊日記，突然間傳來日本消息：「北海道列車貨車相撞1死8傷　傷者包括4名中國公民」。

　　事件發生在2026年1月26日，消息如下：

北海道列車貨車相撞1死8傷　傷者包括4名中國公民
　　【Now新聞台】日本北海道有列車與貨車相撞，導致1死8傷，傷者包括4名中國公民。
　　日本傳媒報道，事件在當地周一早上，於北海道根室市附近1個鐵路交匯處發生，1列開往根室的列車與1架闖入交匯處的貨車相撞，事件造成貨車司機死亡，列車上有8人受傷送院。
　　內地傳媒引述日本警方消息指，其中4名傷者是中國公民。中國駐札幌總領事館表示，將應當事人需要提供領事保護及協助。

　　剛巧這幾天日本暴雪，交通受阻，原以為與暴風雪有關，其實唔係，只不過有貨車闖入交匯處肇禍。

　　重點也不在這裏，諗極都唔明，日本發生車禍，應該是日本人受傷和死亡，最估唔到竟然傷者中有四名中國公民。

　　唔係自去年（2025年）已經叫你哋唔好去日本，因為既有天災治安又唔好，去日本容易發生危險，自從發出警告之後，每個月有幾千班飛機取消，特別是中國的航空公司，原因退票達到過百萬人次。

　　叫咗唔好去都仲要去，都唔知坐咩航空公司的飛機，現在發生交通意外喇，唔好話無事先警告喎。

Honour（榮譽謀殺）

　　榮譽謀殺、名譽殺人有定義，詳見維基百科。

　　根據真實事件改編的英國劇集〈Honour（榮譽謀殺）》，內容講述一名已成英國公民來自伊拉克少女被家族成員殺害的故事。

　　維基百科中《Honour》，有英國評論批評劇集把重點放在調查上，而不是受害者。

　　對於發生在伊拉克、阿富汗、印度、巴基斯坦的「名譽殺人」有時我們也感同身受，但發生在西方文明國家則不能想像，何況受害者已多次報警，但那些自稱大愛包容的西方左膠，竟然無動於衷，直至悲劇發生才驚覺大禍臨頭。

　　而由巴基斯坦裔導演所拍的《河中女孩：寬恕的代價》記錄了另一宗悲劇，說明「寬恕的代價不代表自己內心真正的釋懷，而是可能使自己再一次陷入危險當中。」其實並不是使自己再次，也可能把別人同樣陷於危險之中。

　　劇集在網上可以找到，今天看來大概明白為何川普和以色列並不會和那些人對話，因為永遠唔會講得掂，不是西方文明強加於他們之上，而是他們要現代文明回到蠻荒，難怪川普如此討厭那班大愛包容的左膠，因為愛與寬恕唔係幫人，而係害緊別人和自己。

菠蘿薄餅

　　意大利人都幾風趣，其實佢地係唔多介意在Pizza用上菠蘿，因為各地口味不同，不過始終有人喜歡原教旨，如果真係意大利人講係罪過，反而絕對唔會反駁，那些扮Ciao佬扮正宗嘅唔該行開。

　　母親喜歡食Pizza，更喜歡加菠蘿，她去過日本的沖繩，到著名的薄餅鋪所食的都係菠蘿薄餅，她本來也想去意大利，可惜年紀太大亦兼坐飛機太耐，無去過意大利，她當然唔知道意大利薄餅唔可以落菠蘿，但如果你同佢講，她會反問點解唔得。

　　終於Domino's Pizza替我們做了一件大事，去到梵蒂岡禧年期間，替菠蘿披薩卸去罪惡，自始安心食件菠蘿Pizza。

讓座

　　某日搭巴士，樓上沒有座位，於是返回樓下，站着的乘客已有七八個，奇怪的是竟然還有座位沒人坐。

　　那兩個座位當然係「優先座」。

　　有座位而無人坐，是否有些浪費？無謂諗咁多，坐低休息一陣，有人要坐再讓也不遲。

　　巴士上有優先座唔知幾時開始，以前——廢老很喜歡講——無優先座之時，遇到有需要的人大家都會讓座，邊個位都得，只要大家合作，自然能和睦相處。

　　不知何時開始，當大家都較為富裕之時，總覺得應該對社會有所供獻，或者內心有愧，點解自己會高人一等，於是說得好聽就是回饋，難聽就是應該幫助弱勢。

　　點解會覺得對方是弱勢？因為內心已經覺得自己強大，自然需要照顧弱小。如果在一個較為公平的社會，例如人人排隊搭巴士，早上自然有座位，遲來選擇相對較少，其實無所謂有位無位，真係要有座位可以等下一班。

　　優先座本意係讓一些人優先坐，但誰人優先無標準，今天可能是我明天可以是你，因為優先本來也有先到先得之意。

　　日劇《律政狂人》第一季第一集中有這一幕，亦很特別，一個初出茅廬充滿熱情的新人，未知人間如森林不知險惡，與一位看破人情冷暖的真小人相遇，當中亦有強辭奪理處，也無所謂對錯，在真小人與偽君子之間只不過選擇了真小人而已。

煲錯劇

　　開始時已睇緊第二集，初時唔知講乜，只知由小芝風花與佐藤健主演，劇名《私の夫と結婚して》，中文名《和我老公結婚吧》。

　　日劇雖然大部分很公式化，離不開勵志，拍攝手法千篇一律，卻成了全世界的獨有特色，例如大多是定鏡，絕少手搖鏡頭，會說明前因後果，連曾出場人物與場景也會以轉換了顏色再出現一次，恐怕觀眾會忘記。

　　見係日劇睇吓無妨，但睇多一集半集，總覺得唔多似由日本人創作，於是上網搜尋，才知由韓劇改編，立刻打了折扣，終於睇到結尾，覺得韓劇其實唔需要創作，只要復仇與神經病便成了所有電影電視劇的元素，其他就是充滿了血。

　　世界並不完美身邊也有很多害你——雖然未必一定要害但一定唔想你好——的人存在，但係咪一定回來之後來一次復仇呢？

　　本來既然你咁鍾意就「和我老公結婚吧」也是不錯的主題，可是如何拍十集的故事應有難度，於是幾乎要搞到大家同歸於盡才能收科，如何令觀眾有共鳴？覺得此愛才最幸福？

　　這些穿越的半幻想故事，應有更多天馬行空的發揮機會，可惜韓劇就是沒有，連由日本人再創作也救不了，已知劇本之爛，下次再遇由韓劇改編，幾乎可以肯定唔使睇，無謂浪費時間。

電視劇：Mr Bates vs The Post Office

　　無意中在nowtv睇了一套由英國itv製作的《英倫冤案：貝茨先生Vs郵局》（Mr Bates vs The Post Office），維基百科同樣譯為《英倫冤案：貝茨先生vs郵局》。

　　兩日一口氣睇完四集，現時稱之為煲劇，因為第二天要返工，不可能一日煲完。睇後阿豬及軍仔好驚驚，從前以為英式法律好公正兼持平，原來都係一個樣，官僚精英永遠高高在上，一副全是別人做錯的嘴臉。

　　這件事件發生在1999年至2015年，期間1999年至2010年這段時期為工黨執政，如今部分案件得以重審，則是保守黨上台後所發生的事，連「前郵局總裁Paula Vennells更被舊事重提，在聯署下被撤銷其大英帝國CBE榮譽勳章。」（維基百科）

　　打官司要花幾千萬鎊，說明法律係富有人家才有能力，但追求真相，則是一個勵志故事，不計十多二十年後會如何，花上一生精力亦不計，這才是電影電視或書本內容的目標，而不是在殉情記中的羅密歐與朱麗葉找個黑人做女主角。

　　劇中其中一個出庭的郵局局長，來自印度或巴基斯坦，被律師盤問時說明英語不是母語，但來到英國，只為付出勞力為這裏作出貢獻。沒有漂亮的言辭，更沒有要求優惠，這才是平等的表現。

　　小市民能夠做到能力內所能做到的事，成功不必在我，已經非常了不起。

我討厭黑超……

　　十九才子經常講「我討厭政治」，的確係，Dr K早於個多月前唔知係邊度商場彈鋼琴，因為移動過鋼琴的位置，結果遭保安人員干預，要把琴按原本的方向擺好，開始的內容大概如此。

　　保安一向都按本子辦事，最好無事無幹唔好煩，然後等出糧。咁樣真係似英國或美國的公務員，凡事千萬不要多事，保安叫你做乜就做乜，叫你向東你就向東，向西就向西，叫你唔准就唔准，無論你有任何理由。

　　一睇就知戴黑超的人係多事精，更有某種性格，你叫他唔好做他偏要做，但一切都要講理由，唔係你話係就係。

　　結果真係英國妹好玩啲（係另一段Dr K自己講），彈埋一份，和氣收場。至於其他，留待網上慢慢睇喇。

網絡劇

　　最近學人追劇，一套在Netflix串流的日劇《火燒御手洗家》，最後三集一晚睇完。

　　由漫畫「御手洗家、炎上する」改編，看似復仇故事，當中有懸疑亦有鼓勵，當然重要係要有寛恕與懺悔，如何化解要看導演編劇的功力，演員的努力更不可少。同是日劇，串流與傳統的敍事方式與攝影方法也有不同。

　　如果無自由創作，亦有甚多條例限制，結果係睇住張白紙也不能，所有會是被填入，到時大家安樂。

　　日本製作可以係一條龍，有電視劇，有廣告，有主題曲。已無聽歌很耐，只找到主題曲由這位稱為年輕天才的Vaundy所唱及創作，歌名カーニバル，根據Google翻譯為「狂歡」。

　　一般電視劇會有美好的結局，日劇更要付出加倍努力，至於會否加倍奉還，最近日本駐港領事講一定唔會。

　　講開日本，八月二十四日開始，日本開始排放核廢水入大海。並不是贊成日本這樣做，而是想問，個海咁大，海水四圍走，無理由只係禁止日本海產，應該整個大平洋的海產也禁才能保平安。至於陸上，有誰擔保農田附近有無排放污水入河入江入海，因而影響農產品呢？看來這些都係無人會問。

　　煲吓劇算喇，無謂問咁多。

偵探劇

　　早年麗的電視的偵探劇，包括神秘之夜的哥倫布探長，類似的英國劇則有脂粉雙雄、雌雄幹探、俠聖等，之後已經唔記得。

　　有一段時間沒有睇電視，直到Viu開台，無意中睇到Lewis，當時第一個印象就是點解咁舊都可以在Viu96睇到，再睇清楚原來係英國itv劇集，於是一直睇到結尾。

　　及後Viu96可以緊隨now後播出Endeavour，唔知睇到第幾季停咗，於是上網睇，終於也到了最後一季，但係最後兩集仍然留待有心情時才慢慢欣賞。

　　英國劇集與美國大不同，多了人物性格的描寫，也多幾分無奈與遺憾，悲觀中有着鼓勵，人性險惡與人生挫敗，並不影響對世間的愛。

　　至於Inspector Morse，於一九八七年開始第一季，因為年代已遠，電視台當然不會重播，也只好網上看，可惜並不齊存，未能睇到最後一季。

　　網上一篇「名偵探的悔恨」，首段的中文翻譯吸引了閱讀的興趣，附錄如下：

夕陽西沉

染紅天際

往昔聲光

已不復見

白日悔恨

墜入塵土

（Ensanguining the skies

How heavily it dies

Into the west away;

Past touch and sight and sound

Not further to be found,

How hopeless underground

Falls the remorseful day.

——A. E. Housman）

這是英國推理劇《摩斯探長》（Inspector Morse）最後一集播出時，主人翁摩斯在劇中吟詠的詩句。當時是2000年底，全英國有一千二百五十萬觀眾收看這橫跨十八年、共三十三集電視劇的完結篇，摩斯探長帶給大家六十六小時的心靈饗宴終告散席。