青根與黃腳鱲

　　母親一向喜歡食魚，以前一個星期一次，逢星期日去完聖堂順便走去碼頭，貴魚唔多捨得買，普通魚喜歡青根與鱭魚，可惜唔係成日有。
　　武漢肺炎影響所及，早上的兼職停工，母親亦減少外去，為了保持早睡早起的習慣、於是和鄉下婆一同出門，她返工自己則去逛碼頭，亦可代為買餸。
　　早上八時前，幾檔走鬼檔專門販賣海魚，有些來自養殖場亦有新鮮捕獲，也包括蝦蟹甚至瀨尿蝦。蟹和新鮮鮑魚較為麻煩，所以唔會買，游水蝦貴一點但可以白灼油爆，味道係唔同。較大條的魚如石斑之類，怕食唔晒亦不在考慮之列，現時的牙帶都唔知養還是捉，試過一次和以前的味道已經唔同，至於紅衫，雖有八種之分，但係又細條也不是長尾衫，大條則價錢較貴，唔多識買。
　　這天見到有黃腳鱲，斷斤秤，一條約廿幾蚊，其他有些魚檔賣五十蚊三條，莫非這條唔係養？於是拿起一條畀事頭婆秤，廿四蚊買了這一條。另外見有青根三十蚊斤亦買了一斤。這個早上足夠母親忙上半天。
　　翻查網上，黃腳鱲雖有垂釣但大部分都已是養殖，多數來自台灣，食落肉質與其他同屬養的魚差不多，失卻原有的味道。至於青根，暫時仍以垂釣方式捕捉，外貌有點懵，肉質一梳梳算是好味，近年母親多以連頭部的前半部分切下，上半身用來煎（或餞）啖湯飲，下半身煎香，一魚兩食。
　　近年也可能捕獲過度，很多時所見比較細條，新鮮時還可以清蒸，不過多骨，還是煎比較好味。