分擔

　　肥綿羊Shirley到旺角逛街，回程時乘巴士時還未坐好，司機因前方出現突發情況而剎車，腰部撞及扶手。當時不怎麼樣，待下車時覺得隱隱作痛。
　　剛巧第二天覆診，隨口問醫生：「以前做女時聽阿媽話，話撞親後幾多歲就痛幾多日，我今年八十歲，咁係未要痛八十日？」
　　醫生可能都係第一次聽聞，只好安慰說：「唔係嘅，都係講吓啫。」
　　痛或者唔緊要，可要忍忍，但要痛八十日就真係流流長。
　　「唔緊要啦，可能過兩天會習慣呢。」
　　「痛都會習慣咩？」
　　農場平日就係咁，見肥綿羊腳痛叫唔好去打麻將，肥綿羊就會說：「打麻雀用手打嘅，又唔係用腳打。」一入廚房，肥綿羊就問：「係未食飯呀？幫手食埋兩舊雞。」話要洗衫，肥綿羊就會立刻拿多幾件出來話要洗，仲話：「個洗衣機洗多幾件會有乜問題。」
　　叫隻肥綿羊行東，有時佢會行西；叫佢唔好做，佢就走去做；叫佢食飽，佢就話食咁飽做乜，一陣可以食碗番薯糖水嘛。
　　聽得多有時好似唱歌，不過這兩天入廚房唔見隻肥綿羊來阻攔，又唔見煲番薯糖水，聽電話時又聽唔到問咁夜打來做乜，只見起身轉身時皺一皺眉頭，就知道背部還痛。
　　沒辦法，煩惱有時可以分憂，但痛楚，又如何可以分擔？