簡體字

　　某日等巴士，見一位女士拿著一疊紙，於每條鐵柱逐張貼上，原來是一張招聘啟事。
　　一向都有找兼職的興趣，趁巴士未到立刻仔細留意內容，但一看見第一個字已經睇不下去，雖然特區香港早已成了共產中國的某一個沿海城市，但行文仍然使用正體字，但不知何解總有人希望早日大一統，既然連用字都要跟隨大陸，咁點解行車方向，政府公文等唔改埋呢。
　　再睇真一點，用簡體字都唔緊要，也許所聘請的對象主要從大陸而來的新移民，但內文的「請電」卻寫成「清電」。為何如此？因為簡體字中的「請」，驟眼睇真係似個「清」，連印了出來個老闆都唔識分，無所謂，反正中國人根本唔想識中國字。
　　又話要愛國，但愛中國唔識中文點算愛國？最近連愛國法官寫判辭都用了中文（聽聞也寫錯字），多愛國。至於愛黨愛國愛香港幾位副局長卻不願承認自己愛黨愛國愛香港，難道愛黨愛國愛香港有錯嗎！
　　為了表示愛黨愛國愛香港，唔該凡以前殖民地留下來的所有，必須跟隨現時中國所規定而作更改，如果唔改，是否特區政府內有班人始終戀殖？