膠飲管

　　聽聞有班人喜歡講環保，最近有新意思，叫人減少或不要使用膠飲管。
　　前幾日天氣甚熱，出街一陣已經滿頭大汗，經過一間較像樣的餐廳——唔係茶餐廳——於是入內吃午飯兼略為休息，看餐牌時見有一行小字寫明「本餐廳為響應環保，已不再提供膠飲管」。唔用膠飲管無所謂，一向較喜歡熱飲，所以沒有太留意一支膠飲管對環境原來有咁大影響。
　　這天因為天氣熱，最後都係叫了一杯凍飲，送來時的確沒有提供膠飲管，改為用紙膠管，但是那支紙飲管由一個膠袋包裝，咁即係點呀？
　　以前可能係膠袋包裝膠飲管，今天改為膠袋包裝紙飲管，減少了使用一半膠，的確比以前環保。
　　人類生活在今天，物質過度豐富，有人出來講環保沒有錯，但方向是否有誤？常聽人說應用得用，實際我們能否奉行？
　　唔用膠飲管，但今天我們所用的物品中有幾多由塑膠製成？人手一至幾部智能電話，唔好講部電話，只講每部電話附送的那幾條電線，包裹電線的物料全是膠，貼在畫面上那塊亦是膠，還要一年半載換新，舊的全棄。
　　電子產品無膠不能成產品，醫療用品因全部即棄幾乎全是膠，生活上每一件物品都與膠有關，舉目四看全離不開膠，今天生活已經無膠不能，根本不能想像無膠用的日子。
　　但是那些環保組織竟然可以扮做，叫人不用膠飲管，不要說杯水車薪，根本對世界對環保完全不起作用，既然講環保點解唔徹底一點，就算一塊木頭一杯水，也叫人應用得用唔好浪費。
　　可能自己也有些誤會，有些事情唔可以睇表面，無端端有組織出來叫人唔好乜唔好物，佢地無非都係搵事做，或許有經費也說不定，不然何來又拍廣告又出席會議，當中唔知有幾多浪費——包括膠，那麼膠飲管其實又有甚麼大不了，真係一個謎。