無謂浪費

　　送貨到中西區名校，一早六點半拿著兩箱貨排隊等巴士，前面排著兩母子，個仔看似已經十四五歲，唔係中四就係中三，但個阿媽一面排一面教訓個仔。
　　「衰仔，都叫咗你唔好浪費時間，人生苦短，光陰寶貴，你要睇書嘅話我買畀你睇，睇書一定要睇英文書，唔好睇中文書，睇埋啲咁嘅中文簡直浪費時間。」
　　個仔鍾意睇中文書都唔得？無理由吖。
　　「中文明明係直排，如今變晒橫排，本來係電腦都算啦，話晒電腦係鬼佬發明，但係出書無理由變晒橫排，咁樣係咪叫我哋忘記中文本來就係直排？咁樣即係去中國化呀，阿仔，你明唔明？」
　　個仔略為點頭，好似認同個阿媽咁講。
　　「本來百花齊放，橫排直排都無所謂，有人出版橫排有人出版直排，只要係好書橫直都可以一睇，但係果班已經上咗岸嘅高級知識份子，佢自己攞晒外國護照，但口口聲聲叫我哋愛國，仲要出版咁嘅書，都唔知係咪害人。」
　　「阿媽，唔好咁講，可能佢哋都係受害者……」
　　「這個不是理由，你可能係受害者，同時你應該指出錯處，無理由任得佢繼續錯，除非你同流合汙，使自己變成幫兇，唔該睇睇第八頁這兩句點寫，讀畀我聽。」
　　個阿仔於是讀：「只是我的感情都給了別人。給了那些殘障孩子。我不是一個寡情的人，」
　　「你讀乜？兩行完全調轉再讀一次。」
　　個仔再讀：「我不是一個寡情的人，只是我的感情都給了別人。給了那些殘障孩子。」
　　「咁先啱嘛。」
　　「中文直排唔係由右至左嗎？」
　　「所以我叫你不要睇中文書，尤其這間出版，誤人子弟……」
　　好在這時巴士來到，匆匆搬貨上車，躲在樓下輪椅位，再聽不到兩母子的對話。回到公司，找來這本書一看，的確與別不同，中文直排可以由左至右，以為和英文一樣，如此去中國化，深感那個母親說得有道理，今天的中文書特別係簡體字橫排真的不看也罷，無謂浪費寶貴時間。