婆乸數

　　經過鴨脷洲橋道，見地鐵站一條「緊急通道」，由一座建築物連接行人路，類似行人天橋的模樣，但是這條行人天橋除了建築物之上建有玻璃簷篷，其餘部份則是露天，看來地鐵公司都係任由乘客好天曬落雨淋，從來沒有為人設想。
　　記得香港開始興建地鐵時，大概在上世紀七十年代中，那時在尖沙嘴的圍板上印著「香港地下鐵　為你而建設」的標語，聽落真係幾好聽。
　　未幾，有中國人質疑「地下鐵」是日本名，出於愛國心，認為地下鐵應該改名，那時，連金庸先生（明報）都認為「地下鐵」唔多正確，於是改為「地車」，即係無理由話「搭地下鐵」，應該稱為「搭地車」。
　　結果地鐵公司從善如流，將地下鐵簡稱地鐵，連印在地盤的標語也改為「地下鐵路　為你建造」，讓人信以為真。
　　香港地下鐵至今接近四十年，特區香港就一直好像戰後重建一樣，掘地改路四十年，一直至現在，話就話黃埔何文田已通車，但去黃埔何文田一睇，今天依然像個地盤，看來未來四十年將會繼續掘地改路。
　　無論為你而建設也好，為你建造也罷，講到好像一切只為乘客，但係一條短短的行人天橋，就可知道地鐵這間龐然大物幾婆乸數，興建廣深港高鐵就已經超過一千億，花多十萬八萬做個天橋上蓋都唔肯，你就知地鐵公司幾為香港市民。
　　地下鐵是交通運輸，同樣巴士電車輪船火車也是交通運輸，無理由有地下鐵就無巴士電車，同理，無理有輕鐵就無巴士小巴，有火車就無巴士等，讓地下鐵這間公司壟斷交通運輸，而市民只知「快」，從來無想到被剝奪了選擇的權利與自由。
　　既然特區香港人都習慣了逆來順受，願意接受地下鐵這龐然怪物，其他被剝奪的事自然慢慢都會接受，多掘幾條路改多幾次法又有咩所謂呢！