星聲夢裏人（La La Land）

　　看完這電影出來，有點頂唔順，未見過荷里活拍的電影拍得咁無信心。
　　星聲夢裏人為攞獎而拍，一睇就知討好荷里活討好電影界討好班評審大帝，結果一班人自己玩晒。
　　電影是夢工場，結局可以係大團圓也可以悲劇收場，亦可以帶著遺憾無限唏噓，隔了一段日子，已經唔多記得內容講乜，新一代的電影如即食快餐，根本唔知咩味，亦無留下甚麼深刻印象，至於奧斯卡得了最佳導演，對唔住，能夠拍多幾部再講都未遲。
　　講政治正確，一開始一場歌舞集齊所有人所有膚色，幾乎無可挑剔，不過有點造作。至於所追求的夢想或理想，是否對待職業就只交行貨，對待夢想理想則加倍肉緊投入呢？是否開始時身無分文，到死時躺在金棺材（有樓有車有老公有老婆有工人有個細佬仔或有間餐廳）就叫達到夢想與理想呢？那時是否到了一個終結，毋須再追求另一個夢想與理想呢？
　　這些都是看這電影最唔明的地方，你可以向荷里活所拍過的電影致敬，給觀眾一個夢；也可以討厭來自沒有創作自由地方的資金，也可以說明全片在荷里活拍攝，嘲笑無妨，本來全世界都跟著荷里活而轉，你話好就係好，你話唔好就係唔好，但你現在咁無信心，以後點樣跟你呀？
　　講歌舞只覺柔弱，至於講愛情，男女主角也不投入，男主角太年輕，女主角過譽，唔知係咪價錢太高（荷里活明星高片酬效應）有關，連纏綿戲都唔多場，真係睇唔到兩個如何過電如何令人覺得遺憾。