充電

　　有次搭巴士入荃灣，經過深水埗其中一個巴士站，有位乘客上車後好似趕唔切咁，直衝上樓上最後排座位，初時唔知佢做乜，後來才發現他要為智能電話充電。

　　九巴有幾款巴士在樓上車尾有兩個USB充電插座，至於樓下有無唔清楚，因為很少機會使用亦沒有留意。

　　現時城巴新巴新款巴士中，已經全部座位安裝了USB充電插座，窗口亦有遮太陽簾，還每個座位都有安全帶，至於有無人使用真係一個謎，除非佢係巴士迷，係都試吓安全帶是否操作正常。

　　早前聽聞有家長擔心巴士上的USB充電插座的設計，因為害怕「小朋友」會把手指插入而觸電。

　　其實咁驚應該唔好生存在這個世上。

　　做人無非講常識，家中的電插座正常情況下已安裝了安全掣，英國制式要先按下水線位才能打開活門，歐洲多是圓腳，除了嬰兒之外很難把手指插入，美式日式和中國則是扁腳。至於USB插座，一般電壓不高（三至五V之間），好像接通電池兩極，一般感覺不到，手指亦難插入，亦難以接通天地線，何以家長咁擔心？

　　注意無可厚非，過份則顯得無知，道路本來就充滿危機，教導才能預防，避不開的時候只能勇於面對。