米蘭馬彭薩機場

　　食過早餐收拾好一切，飛機已到了米蘭上空，等候降落。

　　米蘭主要有兩個機場，國際線停在馬彭薩機場，這裏有機場快線連接市區，票價一般較貴，況且我們不太趕時間，並懷着窮遊的初心，多乘機場接駁巴士。

　　機場巴士單程€10，網上預訂來回€16，一個省€4，二人則是€8，足可以食一頓普通午餐，以兩怪之精打細算，必定預早網上訂購。

　　Milano Malpensa機場的網頁有詳細資料，簡單易用，由於機場巴士競爭亦激烈，隨便選一間便可以，反正價錢一樣。

　　離機場巴士開出時間尚有約兩個小時，雖知以意大利人的辦事效率係可以時快時慢，應該主要睇當天的心情，一早畀老婆吩咐要做好一切自然唔多願開工，那時手腳必然較慢，但幾個鬍鬚佬一齊講到AC米蘭或國際米蘭贏咗祖雲達斯，就會睇都唔睇扱個印放行，效率都唔知幾高。

　　以不快不慢計，大概一個鐘內可以出到大堂，於是幾乎最後一個才離開飛機，然後慢行至海關。行了約十分鐘，指示牌仍然指示還有一段路，可是已見一條長長的人龍排至另一端，唔使講，這條人龍大部分必定來自第三世界——即唔係使用歐盟護照，咁即係要等幾耐才可過關呢？