芝士與雲吞

　　小時候很少機會食芝士，牛油則多用來搽麵包，後來母親話食得牛油多會肥和膽固醇高，改了用人造牛油。

　　芝士幾乎無機會試過，直至卡夫出了片裝，才有機會食到。

　　後來當然嚮往西方，開始買來試，唔食得咁多亦唔識分，味道與預先包裝的完全不同，始終要到較大型及外資的超級市場或專門店購買，唔係咁方便。

　　來到意大利博洛尼亞，這裏鄰近盛產芝士的帕爾馬，亦有火腿，難怪成條街都係芝士鋪，甚至芝士火腿一齊食，至於點樣才可稱為上品，一向無研究，不過意大利出品應該肯定有品質。

　　至於雲吞則是博洛尼亞的著名食物，以小見稱，至於點煮，曾經食過放湯，因為餡料以豬肉為主，鬆軟味香而多汁。

　　初時以為只有細細隻，原來還有像上海雲吞大小的，而更大的雲吞以顏色皮作襯，包法為意大利獨有，四方形皮對角摺，然後左右對黐，而上海雲吞則是四方形皮兩角對兩角對摺，把包餡一方再向上反，跟着把對摺下方反過來一屈再黐上，外形像一隻銀錠（元寶）。

　　這些大隻的意大利雲吞，一公斤售27.9歐元，約港幣280元，份量應可供四至八人，當然還有其他配菜與食物才夠。

　　意大利人包雲吞，即搓即包，先全部放好餡料，然後逐隻對摺，最後一次過黐角，特別包細細隻係要講耐性。