對話

　　來到火車站，碰到舊同事，見他鬼咁開心話要請飲茶，於是問何以咁開心，怎知他說公司下個月實行五天工作，所以要慶祝慶祝。
　　「點解公司突然間咁好，畀咁多員工五天工作？，唔通要向英德法學習，一於歐洲化？」
　　「係呀，老闆話平日見班員工咁辛苦，個個都超時工作，做到病都要返工，為了回饋員工，也為了員工可以多點時間陪伴家人，所以由四月一日起五天工作咁話。」
　　「多點陪伴家人，咁應該唔使做，天天都陪伴嘛，又有糧出，幾好。」
　　「咁又唔得，唔做點有糧出。」
　　「五天工作，即係少了工作時間，那便要請多幾個人？」
　　「咁又唔係，老闆處處為我們著想，話只要每個人每天做多兩個鐘，一個星期即多了十個鐘，咁先可以五天工作。」
　　「咁就唔叫五天工作啦，計落每星期仲要做多一個鐘。每天做十一個鐘，即時工作量會增加，變相人手可能會減少，因為十一個鐘可能要用十二三個鐘才能完成，每天下來，再加上下班交通時間，剩下來每天能見家人多少時間？況且如何陪伴家人，如何分配工餘時間根本由自己決定，何須老闆替我們著想。」
　　「唔係呀，老闆唔係咁講，還曉以大義，講到鬼咁好，既可多了時間陪伴家人，每天工作量及產量又可增加，更可多了抗逆能力，幾好。」
　　「諗落都係，人家英德法每個星期工作才四十小時不到，這樣才叫真真正正的五天工作。香港的所謂五天工作，相信只有極聰明的人才能想出來，如今再來一個最低工資，變相減去吃食及休息工時，條數真係唔識點計……原來特區香港的文人的確想得周到……」