留一點白

 　大概花了二十五年時間，輸入約二百萬人，再用十五年時間，收賣當年的少壯派今天的話事人，又教育又洗腦教導一班有樓（住油麻地上海街望廟街「豪宅」）有家庭有子女月入唔超過五萬自以為「中產」的社會棟梁，答應一班上世紀八九十年代出生新生代有機會入大學前途無可限量但對前景無要求喜歡逆來順受的未來主人翁，間中又嚇嚇地產會跌特區會死無大陸唔掂，抹黑願意跑出來爭取或示威如長毛之流係搞搞震無幫襯阻塞交通唔畀人開工阻住人發達，慢慢變成只得一種聲音。
　　動用國家機器兩地政府公權力，先至掌握每個人的一切（包括小時候偷過粒糖門口放多張櫈考試唔合格睇過鹹書），再找來偽知識份子做喉舌開足宣傳機器，養大班一吹雞全部跪低的英雄豪傑，學孫中山秘密結社，經過精密計算時間配合，都唔知使幾多錢搞出一班變節的白黨，可惜對手只係一隻蠢豬，講得難聽點幾乎連飲奶力都出埋先至緊緊熟，埋單計計這些已經付了款。
　　話就話七百萬，要嚇的只不過約一百二十五萬個家庭，基本上有一半已為了「中產」，心大心細又佔一半，掛住搵食再佔一半，剩下來要嚇的得二三十萬人，那些手握話事權卻得千多個，咁都管唔住，理應受罰，何來有獎？
　　將來的代價是甚麼？唔知道。人類六十萬年來能夠馴服的動物不超過二十種，而且大部分都係食齋，野獸有本性，始終要咬要食肉，這不是牠的錯，係死都要養佢（或以為可以馴服）闖出來的禍。
　　有些事情毋須太悲觀，在烈日高掛遍地陽光燦爛的日子，偶然映出月亮的蹤影，在落日餘暉漫天紅霞的同時，偶然也留一點白。