識講唔識做

　　瀏覽網上資訊時被強迫睇了這一段廣告，雖然短短十五秒，但覺得很討厭。
　　討厭的原因不是你生仔關人咩事，或是好煩令人不安等，而是畫面上想表達的事情，與現時所推動的母乳餵哺或廣告所推銷的內容相悖。
　　先描繪廣告內容，講一位母親說產假就快完，「我想自己繼續埋身餵奶，畀最好嘅營養畀BB……」，畫面上見母親正以母乳餵奶，但係見唔到BB個樣貌。
　　為何見唔到？因為這位母親以一件可以掛在頸項上的布袋包著自己雙手及似是一個BB的物體——可見一對腳——放於自己胸前，然後希望大部分觀眾明白現在正在母乳餵哺。
　　從畫面看，相信這位母親安坐家中，但如果在家中餵母乳，點解又要用一件出街才會用的「餵母乳用包裹布」包著自己呢？當然在家中以母乳餵BB亦可以很優雅，拉好窗帘關上房門已經可以，如果屋企都要用上遮布，咁真係想叫人用母乳都難。
　　當然你可以說這是拍廣告，無可能袒胸露背因為唔出得街。大佬，你可以用鏡位遷就嘛，就算真係拍個母親餵BB母乳又有甚麼問題呢？那班人不是經常叫外面的無知市民唔好歧視以母親餵哺的嗎？
　　由此可見，用把口講個個都識，真正做起來無人願做，影片不禁令人懷疑那種宣傳態度，連拍廣告賣廣告都無半點誠意，咁點叫人以母乳餵BB！