初心（城巴656）

　　根據教育百科初心的解釋：最初的心意。

　　至於初衷的解釋：最初、從前的想法、心願。

　　讀書多數講初衷，近年多講初心。唔緊要，意思大致一樣，但似乎初衷比初心高一層。

　　城巴今年四十五周年，一連串活動宣傳，可惜一個都無份，唔係唔想參與，而係要等二十五分鐘至半個鐘才有一班90出環，等咁耐，仲邊有興趣參與，幾乎連街都唔想出。

　　在宣傳中，好像提到「初心」。一聽到甚麼初心呀初衷呀，心中不禁佩服，已經過了咁多年，仲記得初心初衷真係非常難得。

　　好像一對令人羨慕的夫婦，由相識追求那一天開始，直至後來結婚過了四十五年，就在這一年突然個男對個女大談初心這回事，如果無畀個老婆打到豬頭咁，一係就會問點解你唔早啲講。

　　人係咪每天一定要進步可未必，但總希望今天比昨天有改善和更加美好，這是對真善美的追求。

　　初時巴士無幾多架，但能以頻密取勝，後來與新巴同一個老細，無競爭的話班次開始比之前減少，好像8X與789，真係唔知點形容。再之後南港島地鐵線和東鐵線通車，立刻舉手投降，取消路線及減少班次，明明有客都唔做，係要讓給地鐵，結果求仁得仁，例如90要繞上利東，倒不如取消由鴨脷洲邨總站，直接由利東開出。

　　如果咁叫初心，真係值得恭喜。

　　（車廂內並非656）