排隊

　　上午返工繁忙時間，來到西隧口巴士轉車站搭巴士回南區，這裏除了同系車可以免費或以優惠票價轉車外，還有從另外地點轉往南區返工，所以極之多乘客聚集。

　　個個人都排隊守秩序，當然一定會有人抱僥幸心態，不排隊之外還要破壞秩序，幸好巴士公司有職員維持，秩序才不致大亂。

　　因為凡有貪小便宜怕蝕底的人存在，一個係咁跟住個個都係咁，大家都屬同一類人，只不過早二十多年前再之前有幾十年有所謂近朱者赤，個個向好的學習，注意係學習，希望能有所進化。

　　這是以前的事，近二三十年間，跟着那一句是近墨者黑，正所謂學好者分分鐘要三幾十年，學壞唔使三秒，好像野豬一樣。

　　家豬由野豬畜養而成，毛變短連獠牙也消失，甚至脾氣也會變好，因為好食好住，送往屠宰還有音樂伴奏，那些大廚經常介紹豬的好處，所以豬也覺得犧牲自己為人間帶來美食也無所謂。但如果把家豬送回野外，聽聞唔使三個月，立刻會變回野豬，毛髮增長變粗，獠長開始長回來。

　　由此證明，天性很難改，馴服了百幾年後唔使一年，立刻找回從前的親切感。

　　胡思亂想之際，突然間有位學生模樣的年輕人——應該返香港大學——唔排隊撲上車，工作人員立刻喝止，並叫他排隊，誰知他這樣理直氣壯回答：「你見唔見條人龍幾長呀，點排呀！」

　　近墨者黑還可以明白，難道今天的教育以反面成為了教材？