講價

　　要辦理BNO續期，於是去影印身份證和舊護照。來到影印店，前面有位穿著漂亮手執最新iPhone 6的女士正在問價，問影一張幾多錢，影印大叔答每張五毫。五毫都算廉宜，外面很多都收一蚊，免找續。
　　以為這位女士會拿出文件來影印，誰料她繼續問：「咁影十張幾多錢？」影印大叔依然木無表情答：「五蚊。」
　　「咁影二十張呢？」
　　「十蚊。」
　　既然五毫一張，十張五蚊二十張當然收十蚊，無錯噃，唔通個女士唔識計數？原來唔係。
　　「影咁多無得平嗎？」當女士問完這句，有如燃點起炸藥般，只見那位影印大叔兩眼發出光芒，踏前了半步，開始發表他的偉論：
　　「你去蘋果買部iPhone 6，一部收你六千，你會唔會問個店員話如果買十部二十部有無得平？唔講蘋果喇，你去麥當奴買個漢堡包，會唔會問買二十個有無得平？你當然唔會，因為你唔敢問。人家明碼實價，這裏也是明碼實價，係未小店好蝦！」
　　影印大叔對牛彈琴了，女士似乎唔明這個道理，有點不忿，低頭悻悻然離開。
　　的確又係，部份特區香港人不敢向大公司挑戰，卻向小店苛求減價，還說出大一堆似是而非的理由，實在難頂，怪不得特區香港已沒有了昔日的活力，因為全部早向大財團大企業低頭，不懂得珍惜人情味濃厚的小店。