人情味

　　今天外勤工作，遇上紅色暴雨，雖然帶了把縮骨遮，工作地點部分亦有瓦遮頭，不過如果遇上大雨，幾乎肯定不能倖免，一定濕身。
　　剛到現場準備開工，一名高層駕車經過，停下來問有無帶遮，回答他說已帶了，萬一真的落大雨，到時會先躲在一角，再看情況決定如何完成工作。高層臨離開時說「咁小心點啦。」
　　過了大半個小時，天色轉暗，看來大雨將臨，這時另一位同事駕車來到，拿出一把比較大的遮，說：「先拿去用，待會收工時拿回寫字樓便可。」連忙講聲唔該，各人繼續自己的工作。
　　幸好至外勤工作完成，只下過一陣小雨，兩把遮都未用過，只用過頂帽擋了便算。準備回寫字樓，這時一部回程車到來，問去哪裏，答說先回寫字樓然後收工。同事問為何要回寫字樓，因為剛才有位同事借了一把遮，現在收工拿回去。
　　「估唔到那位同事都幾有人情味，無話睇住你照頭淋。」
　　「係呀，好多同事都好好，好多我都唔知佢姓乜，佢又唔知我叫乜，但見到面個個都會打聲招呼，講聲早晨。」
　　送回把遮出來，又碰到另一位同事準備駕車外出，問我去邊，我話收工返回大街。
　　「上車啦，送你到路口。」
　　在車上和他閒談了幾句，講到今天個個人都好似無乜禮貌，無話替別人想想人家的處境，只顧自己。
　　大家都有點無奈，這個世界就係咁，很多事情未必如意，不過有時遇到風雨交加的天氣下，想不到幾位完全不相識的同事送上關懷，算是得著一絲安慰，同時也提醒自己，在這冰冷的人情世態，做每一件事時必須仍然保持那一份熱，千萬不要失去。