八達通

　　最近比較少用張八達通，原因步行的機會多了，除了搭車之外，其餘多用現金，所以對於要更換新卡一直都沒有放在心。
　　維基百科上寫明八達通在一九九七年九月一日開始使用，不知不覺這張八達通也使用了二十年，終於來到更換的日子，但依然放在銀包，沒有動力拿張卡出來，不是不想更換，而是一向沒有搭地鐵的習慣，一時間都唔知去邊度換。
　　印象中，八達通剛啟用不久已使用，因為那時唔知點解，一毫兩毫五毫特別缺乏，巴士小輪不設找續，每次搭車都要準備零錢，初時去銀行找換不用手續費還好，後來要收有點不值，幸好那時開始使用八達通，暫且解決了零錢荒。
　　記得初出之時，有人說不會使八達通，怕張卡收錯錢，因為巴士有分段收費，少數怕長計，每次收多幾毫，十次就幾蚊，對於精打細算的人來說，始終喜歡使現金。那時還有一個傳言，話八達通係由法國人發明，但點解歐洲遲遲唔用八達通或智能卡呢？原因係唔想太多人失業。這事是否真實沒有查證，只當傳言。
　　以一張卡當現錢，自從信用卡推出以來已經有很多人討論過利弊，使用現金和使用付款卡的確有心態上的不同。如果為減輕交易成本，卡當然方便，但從用錢的方法而言，卡為求快捷卻使人懶惰。
　　間中也要搭巴士坐艇，今天百物騰貴，單位早以元計，購物時難以找回一毫兩毫，無咁多毫子坐車，亦無理由坐$4.7的巴士畀五蚊，所以都係要換張新卡。至於張舊卡，影張相當作留念，話晒都用了二十年。