做好準備

　　這篇日記寫於一月二十五日。
　　早幾日收工搭巴士回家途中，近街市的巴士站上來幾個乘客，個個都已經六七十歲的師奶阿叔，上車後碰到幾個街坊，除了互叫早晨問菜幾錢斤之外，第三句就開始講股票。不單講賺了多少，而是講唔好係銀行排隊，因為排得隊等了大半個鐘，價位分分鐘已經唔同，升就最好萬一跌的話，放都放唔切，所以最好就係上網買賣。
　　自問與時代脫節，日日見班師奶阿叔係銀行撳機睇價以為一定最快，原來他們只為消磨時間，真正買賣唔係電話就係手機或上網，真係估唔到佢地咁先進。
　　記得以前曾有一句說話，好似「當街邊的師奶都買股票的時候，離跌市應該不遠。」咁自從踏入二零一八年，恆生指數卻日日新高，咁即係點呢。
　　回到家中，智能電話中的whatsapp被某人加入了一個專講股票的群組，雖然曾經也有買過股票，自從一九九七年起愈來愈多中資加入藍籌之後，已經甚少再有接觸，因為那些錢再不是我們小市民或特區香港人所能夠賺得到。
　　出來工作多年，也記得有人說過，如果有人講自己曾在股票中賺過多少錢，之後亦說你加入買股的行列，你最好和這個人遠離一點，因為這個人不是幫你而是害你，好極有限。
　　你可以唔信，但事實如此。
　　當今天連買完餸的師奶阿叔茶餘飯後講的話題都離不開股票，當自己已有一定歲數而旁邊的人竟將自己加入講股票的群組的時候，看來瘋狂的日子已悄悄到來，幾時見他們開始魚翅撈飯日日講搵了幾多錢之時，自己都要作好準備，因為艱難的歲月快要來臨。