要食菜

　　打風前一日，早上收工經過街市，見人頭湧湧以為發生咩事，入去買六十蚊豬肉，一半用來鹹蛋蒸肉餅一半煎蛋角，肉檔老闆娘問係咪打風前買定肉，答她說只不過咁啱要買。

　　約十時半經過菜檔，所有菜經已賣清，連葱都無條，剩洋葱番薯薯仔，冬瓜節瓜番茄都無，見有蛋黃番薯，買了十蚊，約有斤半重。

　　中午時已知天文台在明天（十三日）必定會懸掛八號風球，不禁佩服科學家的能力與本事，難怪街市超級市場出現小型搶購潮，因為要食菜，亦只為買斤菜。

　　特區香港附近打風，影響包括菲律賓台灣廣東省沿海及海南島，之後吹至越南廣西甚至寮國和雲南，但種植蔬菜的地方很多，加上近年海運空運發達，特區香港幾乎可以買到全世界的蔬果，況且唔食一兩日新鮮蔬菜也不會影響健康，而且這裏更不以農耕為主，今天不運來明天也會到達，究竟是甚麼原因，莫非存在內心深處的逃難DNA又發作？

　　妹仔無你咁好氣，買不到平日的白菜菜心菠菜，改為買包由意大利入口的靚菜，切個蘋果烚隻蛋放粒橄欖，灑少許同樣來自意大利的芝士粉，配合意式沙律汁（來自德國），咁就一餐。

　　邊個話會無菜食！