上網睇The Courier（軍情諜報）

　　這年多兩年，雖然外國仍有電影製作，不過唔係成日可以入戲院睇戲，無辦法下只好上網睇，因為窮沒有Apple或Google，但要睇總會有辦法，好運的話算是順暢，唔好彩則最後二十分鐘隨時睇唔到。咁樣都好，始終要入戲院睇才有那份懸疑，不幸時附送鎚仔。

　　The Courier（軍情諜報）上映時已想去睇，可惜出街要處處當心，由出門搭電梯一刻開始，認識「平安紙」的用法，有手唔用要用腳推開門，或是一副愛理不理的態度入電梯，既不㩒要去的樓層，更不會㩒住個開門或關門掣，以為有毒一樣。

　　咁驚應該唔好出街，更不要返工。

　　搭車已經麻煩，出街食飯更麻煩，一時兩個人一個四個人（一檯），隔塊紙板一條長檯十六廿四三十二都得，大家交足戲大家有飯食。

　　記得初睇班尼狄是Amazing Grace（奇異恩典），飾演英國歷史上最年輕的首相，後來則是電視上的福爾摩斯。

　　電影由真人真事改編，當時處於冷戰時期，現時看來經歷過兩次世界大戰能夠生存下來的人比起今天更有危機意識，懂得未雨綢繆，也不惜犧牲，上世紀五六七八十年代還有追求，反觀今天歐美已大部分向金錢下跪。

　　相信所有政府都知凡有來往當中必有間諜存在，無論國與國之間或是商業上，大家有來有往看誰高明，也看誰心狠手辣。

　　英國人有份拍自然有些較深入的味道，電影中最精彩最後三十分鐘，看似徒勞無功失敗而回，但之後如何無人能夠預料，皆因一切有人願意付出，因為這份努力，結果亦阻止了戰爭的降臨。至於代價，有人家散人亡，有人遺憾終生，無論怎樣，事前唔該有所準備，充實自己，不要放棄。