新顏色

　　新巴自今年七月一日與城巴合併，成為只有城巴。

　　乘客不會理會新巴九巴城巴，只知巴士班次夠唔夠頻密，不然改咩顏色都唔會再搭巴士，改坐地鐵或小巴。

　　今日在臉書上睇見英國的Megabus一段短片，巴士由車頭的藍色延至車中部後轉為黃色，與現時城巴的新顏色剛好倒轉，城巴是由車頭的黃色延至車中部後變成藍色，只不過中間多了一條紅線。

　　聽聞城巴現時的某個光頭高層正是來自英國，不知是否受到Megabus的顏色變奏而有所啟發，還是別有原因，乘客同樣不會理會。

　　昨天下午買餸剛巧經過鴨脷洲邨，城巴正在這裏派發記念品，聽到其中一位職員提醒幾位來取記念品的邨民，叫他們日後多些搭城巴。

　　住在鴨脷洲，其實日日都搭城巴，而且日日都好想多搭城巴，但係一見二十至三十分鐘才有一班90，想去銅鑼灣的592也要等上十分鐘甚至二十分鐘，590、96、94、94X又取消咗，91又要上東邨，99仲要入埋堅拿道西維多利亞公園，平日想多搭都唔係咁容易。

　　多說一句，現時新顏色的黃，唔夠Megabus的黃咁靚。