意大利餐

　　意大利甚多美食，而且無法國人咁麻煩，簡單點一個主菜也可，無話一定要前菜甜品，其實當個侍應向你推介甜品時，即略帶暗示唔該埋單，除非你繼續食甜品又加多杯飲品。

　　很多餐廳需要預約，無論電話也好，預早到來講聲也可，大部分侍應或老闆都會記得。但是同樣會有一至兩張二人至四人檯接待臨時入來的散客，主要看有否運氣和準時入內，即在剛開始營業和有客人結數之時。

　　餐廳老闆最樂意顧客大吃大喝，可是遊客可沒有時間食一兩個鐘頭飯，一般多在一個小時內，當然我們絕對不能催促，而是學會享受食飯時刻，同時欣賞侍應的工作，與餐廳的環境，偶然會發覺老闆竟是畫中人，托迪簽名波衫掛在牆上，唔使講店中各人一定是羅馬球迷。

　　最特別係無端端有班人入來，與老闆識與唔識之間，突然間一齊大飲大食（大部分是前菜），以極快的速度飲兩杯之後齊齊離去，侍應迅速收拾，之後好像沒有發生過任何事一樣。

　　一切如同電影電視情節，看得我們目定口呆而又要扮作沒有留意他們，當回復正常後，我們所點的意粉和豬扒（薯頭是伴碟）便一同送上來。

　　時間剛剛好。