仲見新巴4052

　　重陽登高兼掃墓，柴灣地鐵站外仍有城巴388服務，票價加到$10.3，貴係貴咗啲勝在行少幾步，兩個站已到天主教墳場。

　　唔坐巴士可以在柴灣街市後面的新廈街搭電動電梯上到頂，再步行過去，上少幾段斜路，又可欣賞風景。

　　從祥利街步行過來，點解仲見架新巴4052？

　　無論車身顏色，與車頭的公司標誌，完全係一架新巴。

　　新巴與城巴在2023年7月1日合併，至今已兩年多，睇嚟班巴膠管理層有正經事唔做，專做無聊嘅事，例如改吓城巴logo，將個「城巴」搬前等，又將原本四位數的巴士編號改為五位數，但又做啲唔做啲，企圖抹去新巴原有的編號。

　　這樣說好像有些小人之心，但係點解正經事唔做，例如檢討相同路線的行車時間，以前就話兩間公司有競爭，現時同一間卻仍分新巴路線與城巴路線等。

　　結果當然都係正經事唔做，但又要扮做，連站旗都發脾氣改用粗字體，你哋班人嫌個數字唔夠大，於是就迫爆畀你哋睇，滿意未？

　　其實乘客理得你咁多，班次唔夠密而又有得選擇，習慣之後自然放棄坐巴士，服務又唔見改善，只懂得向上討好，這種態度乘客是知道的，當有朝政策改變，唔好話無人再記得你。

　　唔好講咁多，今天真係幾開心，竟然兩年多之後再見新巴4052。