北京飯店

　　從王府井大街向南，經過北京飯店。

　　北京飯店依舊，顏色則好像淺色了。第一次來北京，多住宣武門，因為那裏有床位，北京飯店唔係咁容易住，除了貴之外，亦不能隨便入內，印象中入過去一次大堂，要出示回鄉證，至於入內做乜早已唔記得。

　　北京飯店當年好像亦有床位，如果有的話價錢當然較貴，唔係窮遊所能負擔。記得某年（都係三十幾年前）第一次遊杭州，住在杭州飯店。

　　聽落好高級，其實都係住床位。那時分成男女各一間大房，女的好像501，男則住502，房間由會議室改裝，內設十多二十張床位，好像醫院病房一樣，床邊有一床頭櫃，設有鎖的櫃桶，可放貴重物件，其實多數唔會放，縛在腰間較為安全。

　　離開之日，拿好行李出房落樓，抬頭一看對面門頂的編號「501」便記住了，至櫃檯女職員木口木面問住幾號房幾號床，答「501幾號床。」「501？你是男還是女？是男是女自己也不懂得分，501房是女的，這樣都會弄錯。」

　　那時當然唔敢多說，連忙道歉。住了幾天之後有時真的唔知住幾號房，好像回到家一樣，上樓梯到了五樓自然步入房間到床前，早就忘記了要記住房號，而離開之時那抬頭一望反而影響了記憶，被責罵無可避免，想不到被罵得咁凶。

　　北京飯店對出就是長安街，給我們的記憶同樣是幾十年前，仍然深刻。