感謝上帝

　　黃昏時看亞視新聞，正報道電視廣播發聲明陳志雲即日起復職，聽到陳志雲開頭第一句便是：「感謝上帝……」，鄉下婆立刻問陳志雲不是信佛的嗎？
　　係未信佛就唔知，聽聞他好像是虔誠的天主教徒，如果係，咁仲大鑊，虔誠天主教徒沒有可能說「感謝上帝」，況且以他的性取向……
　　唉，無所謂啦，如今有中國人的地方，或者叫自己做中國人的人，只要有信仰，信佛也好，信天主也好，信基督也好，信道也好，信伊斯蘭也好（這個可能麻煩少少），信玉皇大帝也好，信觀音菩薩也罷，信財神都唔緊要，只要信就得喇，信了之後，咁就可以行惡事，做惡行就無有怕，因為自有上帝菩薩保護。
　　君不見有個神父出來話城中有魔鬼，有個信仰財神的有錢佬出來一話，連天主教教區都要出來道歉。又有個信財神又話信佛的借肚生仔，僭越造物主的角色，只要一話自己信佛兼承傳中國的孝道，咁就可以做乜都得。
　　仲有，話自己信仰共產主義就最大，比信仰天主基督佛道回教都要惡，因為更可以顛倒黑白，混淆是非，受害人要討回公道卻變「尋釁滋事」，全世界都話對，信仰共產的偏話錯，怎樣？
　　所以話，現在不要再做沒有信仰的人，就算真係唔多信，萬一有起事唔該記得求神拜佛，感謝上帝！