送花畀自己

　　年輕時曾聽說過，每逢一年一度情人節來臨之時，總有人會買花送給自己，無非想向人證明自己也有人喜歡。當時想這不會是真的吧，有沒有人喜歡也要向別人證明？除非這人心理不平衡，見個個人都都有花收（其實二卅年前無咁多花）而自己無，感受無花收的無形壓力，於是買束花來送給自己。
　　但是否真的有人這樣做呢？因為從來都不認識這些人，就算有人如此做也不會告訴別人，所以一直無從得知。
　　咁多年都只係聽聞，是否真的有人這樣做呢？真係一個謎。
　　直到最近，謎底終於揭開，原來真係有人這樣做的，做的不只一個人，仲係一大班人，莫非如傳染病一樣可以擴散也令別人受感染，好像自己買花扮別人送給自己啦，自己買個蛋糕替別人慶祝生日但只有自己知道等，這個世界真係莫名其妙。
　　某日到一間大公司修理影印機，接近中午時突然有人拿著咪講請各位同事到會議室一同慶祝公司成立六十五週年一同聚餐，食物有牛扒豬扒雞翼三文魚生及飲品甜品等。一間有一千幾百個員工的大公司週年紀念，唔係去酒樓擺一百幾十圍慶祝，卻要數百員工擠在會議室食件牛扒豬扒？無理由。於是向清潔阿姐瞭解，才知原來係個別員工自己夾錢為公司慶祝。
　　咁嘅事都有，公司唔慶祝，自己貼錢慶祝，難道以為間公司係你自己的？清潔阿姐又搭口話，班人話公司有理想喎，慶祝和公司一同有理想，你都見啦，參與的都是公司中所謂忠貞份子，但始終有幾個無理咁多繼續努力工作唔會去食，這樣才叫有自己的理想。
　　連阿姐都識這個道理。工作要講理想，沒有錯，但講理想是講自己的理想而絕不是講公司的理想，公司的理想關你叉事？況且公司的理想會變，正如人會變一樣。
　　公司唔慶祝，自己貼錢慶祝，這和買花送給自己有甚麼分別？收拾架生時候，想起了納蘭性德的一首詞，回到鋪頭上網找了出來。很多人只會說別人變了沒有堅持原則，但從來不講自己也變了，甚至連原則也沒有了，卻總喜歡將責任推在別人或公司身上。
　　如果真的有本事，何須向別人證明。附納蘭性德《木蘭花．擬古決絕詞》：

《木蘭花．擬古決絕詞》納蘭性德
人生若只如初見，何事秋風悲畫扇。
等閒變卻故人心，卻道故人心易變。
驪山語罷清宵半，淚雨零鈴終不怨。
何如薄倖錦衣郎，比翼連枝當日願。