鉛水

　　有些事情真係諗極都唔明。
　　本來工程因偷工減料或各種原因引致出事並不出奇，包括今次啟晴邨食水含鉛量超過可接受標準，但奇在事後竟然有咁多人走出來話飲多少鉛水無事等，為何會出現如此情況？
　　人性醜惡唔使講，所以做事有標準，事前簽好合同事後後有測試，更有監管機構，港英時代以前如此，就算中國人當家作主都係咁，最多貪污比以前嚴重，但亦不可能沒有標準可言。
　　好像啟晴邨食水含鉛，當發現可能與承建商有關時，特區政府只要規定出事水喉全部更換，之後追究責任便可解決，但唔之點解，出事後會有一班人甚至係醫生走出來，講一些「就算食水含鉛都唔係問題，一生人拉勻計飲多少鉛落肚都無問題」、「驗水要開水喉十分鐘才可以驗」、「咬鉛筆頭都可以吞鉛落肚」等。
　　大佬，正所謂無事好地地，有事心掛掛，如果未有證明水中有鉛，日飲夜飲當然都覺得清甜，但係如今話你聽水中有鉛再叫你日飲夜飲，就算真係無事都變有事，這是心理問題，連醫生都唔明心理都係病的一種，難怪她講的概念全世界的人都唔明。
　　最奇妙仲有人搬英國美國標準出來，話人家會開幾分鐘水才抽水化驗，但又唔講英國美國標準每當一遇這些事情發生，那些官員承建商等全部準備隨時上法庭，畀人告到甩褲，賠到你破產。
　　所以話一切按中國標準便沒有事，賠錢？有。更換？有。水依然含鉛或其他雜質，這個也有可能，但總沒有人出來飲含鉛水係無事嘅。可惜唯獨特區香港有。
　　今天的情況，日日喊萬歲並不表示你愛國愛黨，更不表示你識做人，只會更加人唔人鬼唔鬼，漸漸變成特區香港的特色了。