你走先

　　因為香港仔隧道塞車，來遲了點，修理影印機至中更下班時間仍未完成，幸好這間公司二十四小時辦公，一更收工，另一更接上。
　　等待試機時，見一個貌似上司的人從房間走出來，拿著幾張紙匆忙走到其中一張寫字檯對著個職員說：「你係未要趕車，咁你走先啦，這幾張紙由我跟就得，你走先啦。」
　　那個職員木無表情，略為收拾後仍有些放心不下，回過頭來看看他的上司。只見這個上司非常體貼，連忙再說：「你要趕車，你走先啦。」那個職員都無謂再推，急急腳離開。無意中瞥見牆上的時鐘已是下午四時十五分。
　　試機完畢，走入茶水部準備飲杯水兼洗手，碰見清潔阿姐，和她閒聊幾句，話這間公司的上司都唔錯，可以替下屬完成工作，又叫職員收工，咁好的公司在特區香港已經難搵。誰料阿姐嘖嘖聲手掌向下一擺，以「你以為啦」回答。於是向她請教，何以上司如此。
　　阿姐話：「次次都係咁，人家係四時收工的，根本兩三個鐘前人家已經將那幾張紙交了給他，但係唔知點解，可以佢多嘢做卦，係都要等到收工的時候才拿回來，那幾張紙又唔係合同，另有部門負責跟進，根本只係等佢過目兼簽個名，跟著就可以傳真給人家。怪就怪在這裏，係都要過了鐘先至交出來，等人收唔到工，你自己唔鐘意收工好像別人都唔可以收工一樣，講就你走先，好似好好人咁，但明明人家已過了收工時間，咩你走先？係未有補水？真係講得好聽，簡直變態。」
　　「咁佢都好吖叫人走先……」都未講完，阿姐繼續講：「班高層個個都咁奇怪，好似無時間觀念咁，如果真係忙大家都知，唔會催你，好似那幾張紙咁，睇兩三個鐘頭都唔緊要，但當佢簽完名攞番出來，佢係會站在職員後面，睇住個職員親手傳真，莫非你好得閒？」
　　都係唔好再問咁多，難得阿姐咁憤世嫉俗，再講落去係自己收唔到工，於是和阿姐道別話下次再聽這間公司的怪人怪事。