吹神

　　這天來到馬會附近一間公司修理影印機。馬會只是簡稱，淪陷前稱英王御准香港賽馬會，淪陷後簡稱香港賽馬會，兩者有甚麼分別？大概以前要英王御准，如今不用了。
　　一面修理一面聽著兩個大叔對話，其中一個說現時比較難請夜更，後生唔願做或者喜歡晚上出去玩，但連有十多二十年工作經驗都唔願做夜晚，唔通個個都喜歡留在家中煲劇？
　　另外一個說，或與出唔起人工有關吧，夜班車費較高，通宵巴士貴成一半有多，住遠一點要二十多元一程，天水圍更要三十幾蚊，所以現時比較難請人。
　　說著說著突然有一個貌似高層的人走出來加入談話，大大聲講：「點會請唔到人，有錢就有人做，你慌無人見工。」
　　兩個大叔其中一回答：「講係咁講，但係好似無乜人願意做夜晚。」
　　高層繼續大大聲驚死無人知說：「點會無人做夜晚，返夜晚都唔知幾好，街上人又少，唔塞車，連泊車都唔使錢，其實我最鍾意返夜晚，錢都慳唔少……」
　　另一個大叔問：「咁你唔返夜晚？」
　　高層：「我這份工返日頭㗎，我其實都想返夜晚，但係咁點返夜晚？」
　　大叔追問：「咁你可以辭咗現時份工，搵份返夜晚的工來做，或者叫公司開個職位叫你返夜晚，咁咪可以返夜晚囉。」
　　還是第一個大叔醒目，立刻轉話題：「這個星期日放假，去哪裏玩？……」那個高層才鬼食泥咁聲呢喃幾句跟著返入房，返夜晚的事才告一段落。
　　這時另一個大叔細細聲說：「公司就係有咁嘅吹神，怪不得營業額都下跌啦，成日得個吹字，話就話喜歡返夜晚，但係自己又唔係返夜晚，喜歡有個屁用，得個講字，要去實行才真正喜歡。」
　　第一個大叔答：「係咁啦，現在個個都喜歡吹，做人最緊要有人聽你吹，你吹得掂老闆肯聽就得，那班人從來都唔知外面發生緊咩事，總之這個高層由佢後生開始係度做，跟著買樓結婚生仔，自然覺得公司對佢點好，外面的人唔入這間公司係一種損失，公司禮崩樂壞也是由他而起，佢係永遠唔會明凡事都要有代價的道理。」
　　沒有錯，特區香港現時就係多吹神，靠吹來搵食，但係又搵到食，所以特區香港沒落不是沒有原因。