QR Code

　　唔知幾時開始，報紙喜歡用上這個「QR Code」，那時以前很先進，迎接IT時代的來臨，雄心壯志以為印刷與網上可以結合，誰不知是文字媒體喪鐘敲響的開始。
　　那時候已經聽人講，以智能電話上網無疑方便快捷，幾乎可以說即時能知天下事，可是睇書睇報紙與睇智能電話完全是兩回事，睇手機唔會或唔等於會睇報紙，同樣睇緊報紙又怎能睇手機？
　　那時睇某一份知識分子大報，在每一段重要新聞後面必定加上一個「QR Code」，說是「延伸閱讀」或是更詳細報道之類，他們這些編輯究竟有無想一想，明明個讀者睇緊報紙，點解要佢拿個手機出來對住個「QR Code」照一照，然後轉睇電話？
　　咁樣都唔緊要，當個讀者轉睇電話之後，會被其他內容吸引，逐漸便會放棄睇報紙，因為直接睇手機更方便，因為已經再無理由一面睇報紙一面睇電話，除非這個人有特殊嗜好。
　　經過幾日下來，讀者發覺既然電話上網已經可以睇晒全部內容，為何還要買報紙？那些以為能夠網報合一的人是否妙想天開？以為可以大小通吃呢？
　　報紙是報紙，雜誌是雜誌，書是書，智能電話是智能電話，電視是電視，電影是電影，當然可以以智能電話做齊所有事，但係心態上始終唔會覺得是在睇電影睇電視睇報紙睇雜誌等，而且專注力很容易受其他影響，可惜在一體化之下大家做著愚蠢的事，結果給智能電話操控，再沒有了選擇。