因為有免費巴士，也因為武漢肺炎繼續肆虐減少外出，放幾天只選一天活動，避開旺區改去九龍灣欣賞電影。
一向不太喜歡睇鐵金剛即007電影，近年這個丹尼基克更有點頂唔順，唔係那雙眼睛不夠藍，而係經常嘟起個嘴扮冷酷。商業電影能夠賣到錢應該就係受歡迎的電影，至於內容是否一定要睇得明白與合理或合邏輯？換一個角度，如果電影電視或書本能帶來樂趣，應該也是一件愉快的事。
雖說不太喜歡鐵金剛，但係特別喜歡由辛康納利每次講的著名對白：「Bond, James Bond.」講多無謂，正因為佢係占士邦即主角，已經可以飛天遁地，樣樣都係高手，包括開槍開車揸飛機開快艇火車輪船潛艇甚至火箭等，只要他一就坐，全部都可以開得郁亦開得比別人快夾好。其他上至天文下至地理，文化歷史藝術更加唔使講，可以說是通天曉。最厲害一點就是死咗都可以翻生，或者可以說是打不死。看電影時觀眾唔會問，導演亦無咁得閒解釋。
未睇天能之前已有很多「影評」，又說要睇幾次才睇得明等。對於那些「影評」一向沒多大興趣，至於能否睇得明白，從電影院出來，的確唔明，好似熵和返轉頭，但係能夠睇得明的地方，應是那位主角和鐵金剛或是救世者沒有多大分別，以救世為己任。
導演是英國才子，找來約翰大衛華盛頓做主角已見高明，而那位飾演壞人又是另一位英國才子，這兩年導演《東方快車謀殺案》和《尼羅河謀殺案》兼主演白羅。
歐美電影優勝的地方除了場面，偶然亦帶來思考，可惜近年編劇水準下降又要政治正確，連食煙都唔得但又可索K吸毒，因二手煙影響別人而索K吸毒卻是自己的事——班左膠係咁講，可惜其他缺乏幻想與共鳴，只有幾個較冷門來支撐。
人類作惡不是由今天開始，不如返早十萬年不讓人類出現在個世上唔係更佳嗎？或者回轉到那個惡人未出世前將其消滅好似《未來戰士》一樣，世界能否太平一點？既然未來人類覺得今天人類所帶來的罪惡與災難不可饒恕或不能改變，一係自己回到以前去改變，或是㩒個掣毁滅人類算了，不過唔好要其他生物陪葬。
只係想問，究竟當你向前時，那班打倒褪的人和任何物體見唔見到你呢？如果見又可唔可以跟著你向前？這情況如在一個出口處，當所有人走出來時你卻要入內，會發生甚麼事？
沒有留言:
張貼留言