中秋

　　偶然在工作地點聽到電台廣播，某日一個電台廣告中女聲自問自答：「幾時係中秋節？」「咪係十月一日囉。」

　　中秋唔係八月十五咩？

　　十數年前在另一處工作，某位高級知識分子走過來無端端問中秋節係幾時，立刻大大聲答八月十五。那位高級知識分子好似唔多滿意，頭耷耷走咗去，以後再見面大家再無第二句，亦唔怪得從此無運行。

　　八月十五唔係中秋咩？難道中秋還有第二個日子？

　　以前——唔知幾時——日本同樣過農曆新年，自從日本人決定脫亞入歐全盤西化之後，新年從那年起——唔知邊年——定為每年的一月一日，跟隨西方過新年。

　　本來香港未成特區前，每年中秋眾人見面大概會說一年容易又中秋，或是希望大家人月兩圓。近十多年進步太快，大家唔多見面但會傳句「中秋節快樂」或是有月亮有白兔有嫦娥有棵樹或者還有個吳剛的圖過來，每次收到都幾乎唔識點回應，唯有覆個有一隻手指的手勢。

　　碰上八月十五這個日子，希望月亮不會躲起來，繼續發光蓋過黑暗，帶來一點安慰。