蘋果茶杯

　　這套茶杯購於土耳其。

　　當年參加旅行團，已經係廿幾三十年前的事，行程包括土耳其、希臘和埃及。

　　土耳其與希臘為鄰，旅遊車過境亦算方便，但點解有埃及呢，真係唔係好明，仲要坐意大利航空先飛羅馬（無得出境），然後再飛埃及開始行程，為何如此？大概與航線有關，無直航，回程亦要飛返羅馬才回港，相信係要坐共四程飛機才有優惠。

　　來到土耳其，參觀完聖蘇菲亞大教堂，天氣有點熱，隨意走到一間茶檔，聽導遊介紹這裏出名蘋果茶，於是也學人飲蘋果茶，

　　端上來盛載蘋果茶就是這套杯——一隻金屬碟加一隻玻璃杯，熱茶一杯，趁熱飲，清甜解渴並且消暑，飲後坐下休息，即覺清爽涼快。

　　那時也因為喜歡這套杯，於是向店主買下，價錢多少已忘記了，但這套杯的價值令我們保留了二三十年，偶然也有拿出來飲杯紅酒。

　　現在也係時候斷捨離，免將來無人收拾。本想送給別人，可惜太舊顯得沒有誠意，況且這套杯只對我們才有其中的意義。

　　在此寫下這套杯。