「關」

　　父親是上海浦東人，自懂性以來聽他都是說上海話，那時唔多識聽，幸好聽唔明時母親會在旁提醒，後來聽得多自然懂，例如廣東話中熄燈的「熄」，上海話說成「關」，當然是上海口音。

　　十幾歲出來學師，跟的也是上海師傅，雖然那些廣東話都是帶上海口音，聽可以無難度，但要講上海話，始終學唔識，皆因以為有反叛性格唔肯講，其實係唔肯學。

　　父親後來的上海話變成了廣東話帶上海口音，直至最後的一年半載當中，父親又說回了較為純正的上海口音，至於何解，相信父親的腦海中全都是風華正茂時期的事情，離鄉別井如何在一個陌生的地方重新建立一個家。

　　那時家住七樓，父親放工回家爬樓梯至六樓時，會在樓梯轉角天井處叫一聲「開門」（上海話），待我們開門後父親剛好到達，進來時又會着我們「關門」，當然亦都是上海話。

　　廣東話講「閂門」，上海話則是「關門」。上海話中的「關」可以是「閂」亦可以係「熄」的意思，例如「關燈」就是熄燈，「關電視」是我們所講的熄電視。

　　到了現在，自問上海話唔會學識，不過亦係唔知點解，某幾個單音字或是某句說話，卻喜歡以上海話說出來，例如晚飯後待要沖涼前，都會講聲「關」，代表熄燈和冷氣，講多幾次之後，連鄉下婆都在每天早上起牀講聲「關」，即係熄冷氣呀。