英式意大利餐廳

　　英國人唔係唔識食而係唔識煮，這或許與性格有關，他們說天氣太凍無乜心機煮，更會說自己食只為生存所以無乜要求，其實與懶多少有些關係。

　　意大利人食來食去都係意粉與薄餅，但是意粉都可以分好多種，東西南北有別，有粗有幼有長有短有螺絲有捲狀又千層又撳扁，而配料更千變萬化，卻全部統稱意粉。

　　薄餅唔使講，餅就得一個，上面的配料大多離不開芝士火腿番茄煙肉最緊要有羅勒，主顏色綠白紅，至於變要睇個師傅點整。

　　英國人食魚只懂炸，所以炸魚薯條咁出名。也因為如此，英國的餐廳中甚多外國菜，印度菜中國菜法國菜意大利菜等，想食英國菜去酒吧便可。近年中國菜多了南北之分，更有四川湖南，這些留給懷念故鄉的人吧。

　　這晚選了一間意大利餐廳，店鋪相信亦由意大利人經營，因為他們的臉上有着意式的笑容，當晚下着雨，露天座位未能開放，等候的人龍只能站在街上撐着傘，這時侍應走出來，盡量讓客人站到店內一角避雨，當座位安排妥當立刻讓客人入座，這種體貼英國人相信會遲一拍才會做，意大利人嘛還會加埋個心去做的。