魚湯

　　魚檔有條火點，老闆娘問要唔要，咁幾多錢？一秤話要百一，咁好啦，唔該起肉。

　　老闆娘立刻手起刀落，打好鱗然後在魚頭後一切再向橫劏去，一片魚扒起了出來，翻過來再切咁就兩片剩肉，可以用來清蒸。

　　斬開魚頭期間，老闆娘問有份魚頭要唔要，三十分蚊，另有半條唔知咩魚五十蚊，仲話魚肉可以蒸，魚頭煎啖湯，咁就有湯有魚喇。

　　貓仔聽到當然高興，狗仔要食肉，魚肉一樣咁好味，比豬肉牛肉好得多，只是魚骨要小心一點。

　　煲魚湯較為麻煩，之後要清潔廚房，既要隔渣又要清理魚骨，再加油煙，不過想一試煲魚湯，點都有第一次。

　　聽阿媽教落，先用薑片起鑊，落油煎香，到咁上吓開猛火加入清水，滾起慢火大概再煲半個鐘便可，這是母親食譜——即一切隨意，咁就會變成一煲奶白色的魚湯。

　　利用隔篩隔去魚骨，剩下來奶白色魚湯，含豐富維他命及蛋白質，從前無咁多肉食，買些平價魚煲出一啖湯，既有營養，剩下魚肉加點豉油亦是一味餸，年輕時的日子就是這樣過。

　　終於煲成魚湯，剩飲母親話香濃鄉下婆話好味，用來灼菜心加多兩片薑，帶出清甜，一菜一湯已是一餐。魚扒留待明天才蒸。

　　今次的魚頭有點貴，下次買些無咁貴再煲，等貓仔狗仔變肥貓肥狗，連門口都入唔到。