石屎板

　　對面的地盤正在興建大廈，因為屬單幢樓，初時以石屎板釘成模型，然後在適當位置落石屎。

　　這時母親便會說做石屎板很辛苦，日曬雨淋，「你老竇最怕做石屎板喇」。

　　這當然明白，唔好講石屎板，凡戶外要頂着太陽工作，無論邊一行都係辛苦。

　　其實父親並不是做石屎板工作的，早年跟隨他的父親即我的祖父做細木工，包括門窗甚至傢俬等。從前的窗並不是今天常見的鐵窗鋁窗，而是以木砌成，同樣可以鑲上玻璃，因為那時的房屋以一至兩層為主，亦多為木與磚建築。

　　解放前來到香港，這裏開始以鋼動水泥建大廈，舊房屋維修日漸減少，無工開自然乜都要做，唔好講石屎板，但凡有工開，初時唔識做站在旁邊學吓，學吓做吓再加上充吓，幾乎連睇份「則」都要識，就咁就做咗幾十年。

　　石屎板？做。裝修？做。水電？做——咁其實真係唔多識，那時很少換水喉和水管，多數要換塊皮，唔係唔識而係無咁多架生，至於電比較麻煩，換光管換燈尚可應付，拉電線裝個掣要駁電線，真係唔係講玩，結果識多個師傅，為家中安裝了連接洗手間的電掣，自此多了部洗衣機，阿媽洗衫唔使咁辛苦。

　　很多事情已經開始唔記得咁清楚，但房間上面的小閣仔，書房上的書架，留下了父親的手工，唔講得精細，但有他的心意。