通識

　　昨天是入秋以來第一次遠足，由東涌至大澳，步行至深屈灣時，大伙兒在一間門外有一張古老長櫈的茶檔休息，順道嘗試這裏的涼茶。茶檔的婆婆熱情招待，說到深屈灣的趣事妙事，充滿智慧，為我們上了通識寶貴一課。
　　深屈灣現時有道路接通，暫時並無公共交通，乘的士往東涌，約一百五十元，所以如果有甚麼重要事要辦，婆婆還是選擇駕駛小艇到大澳，航程約十五分鐘。未建機場前，來自香港及大陸的水賊甚多，因為兩地走私繁忙，現時較為太平，原因是機場建成後，水警巡邏頻繁。
　　為何會叫深屈灣？「我都唔知㗎？可能外面係大海，啱啱係呢處屈咗個彎入嚟，咪叫深屈灣，應該係咁卦。以前泥灘有蜆，不過是在SARS前後那兩年間才有，都唔知係未為避開SARS先至有。」
　　咁機場建成後有沒有影響？「啊，咁要睇風向，吹東北風就無聲嘅，吹西南風就轟轟聲，以為炸到嚟。以前可以坐係屋外看電視，吹西南風時，坐係屋入面都覺得震㗎。」
　　靜了數秒，婆婆似乎知道我們有疑惑，又說：「吹東北風就果邊起飛，呢邊降落；吹西南風就果邊降落，呢邊起飛，咁就嘈咯。」
　　各人似懂非懂，嘈唔嘈關風向咩事，唔通吹西南風才會將嘈音吹過來？
　　婆婆笑笑口又說：「飛機係逆風起飛吖嘛，起飛果陣時零舍大聲㗎！」