又見煙花

　　埋首工作時，傳來陣陣沉悶音樂，又交響樂，又日本音樂，又國語歌，又梁祝協奏，唔知發生咩事，上網一睇，才知是上海世博會開幕。
　　世界博覽會唔係五月一日開幕的嗎？
　　中國人的確的思想轉得快，話就話五月一日開幕，但可分兩日來搞，四月三十日叫開幕式，五月一日才是正式的開園式，可以正式進場參觀。
　　可是瀏覽上海世博網，明明寫著世博會期是由五月一日至十月三十一日，如今四月三十日開幕，咁係唔係即係四月三十日這一天由晚上八時開始，加入了五月一日這一天？
　　本來想極都唔明，不過一見煙花，完全明白。
　　都話中國人有多少問題，如果任何一個儀式中沒有煙花，怎能叫作一個儀式！西曆新年放煙花，香港農曆新年要放煙花，大陸叫春節也放煙花；慶祝國慶又放煙花；七月一日解放日更加要放煙花；北京奧運開幕放煙花，閉幕放煙花，如今由中國第一次舉辦世博會，沒有理由不放煙花，可是如果五月一日上午開幕，怎能放煙花？
　　都話中國人唔見煙花唔開心，話之你五月一日開幕，四月三十日晚就來一個開幕式，將煙花大放特放，放得天空如白晝，放得天邊泛紅光。
　　他們又可知道，當煙花璀璨過後，就是光芒漸褪，重回黑暗的開始。