起錯？

　　昨午前往深水埗修理電腦，巴士經過西環，準備入西隧，見滿街電燈柱掛滿藍旗，以為國民黨佔領了香港，及後見上面印有兩個大字「起錯」，起錯咩呢？
　　莫非話報紙起錯題？就算係，都唔使咁大陣仗，掛到通街通巷都係旗，話畀人知起錯題。
　　咁係未話中環起錯路？中環原本商廈林立，既有政府總部，連各國領事館都在這裏，非一般凡夫俗子所能進入，平日塞車繁忙，只代表到中環工作個個係有車階級。中環也不需要海濱公園，因為在中環上班的人家家都有花園，個個都有海景，放工怎會逛海濱公園？所以話，興建中環繞道，舊天星碼頭起海濱長廊根本係起錯。
　　過到九龍接近佐敦道，又見掛滿起錯的藍旗。由西隊轉入佐敦道前往彌敦道，經過約九組交通燈，一個巴士站，約十分鐘才駛離，終於知道起錯咩，原來係高鐵總站。的確，高鐵又快又安全，去廣州唔使一個鐘，但將總站起在西九，如果來這裏的交通不改善，沒有從港島、東九龍、中九龍及西九龍直達高鐵總站，次次都要花超過四十五鐘才能由外圍到總站，咁起條高鐵就真係起錯。
　　晚上回家看新聞，才知自已認錯字，古諺有云「少壯不努力，老大徒傷悲」，起錨？去邊呀？個師奶充滿智慧說得一點也沒有錯，起錨？有沒有終點呀？