AM730

　　免費報紙愈出愈多，不過唔係免費就一定有人睇，最重要係有無內容與膽量（最好有禮物送），人報新聞你報新聞，睇邊份都一樣，無評論無立場唔係叫中立，只係牆邊草。如何人無我有，關懷社會，不作惡，不為虎作倀，不為惡勢力張目，在今天大部分已投降的特區香港，做得到真係唔容易，可以說目前情況比國民黨統治時期更黑暗。
　　還看報紙的原因，正是免費吸引。晨早七時未到，出門晨運經過管理處，順便左一份右一份，本來有四份，不過西報睇唔明所以放棄，三份已經好過買一份（講厚度），星期五廣告多，幾乎個環保袋都放唔落，收集兩個星期拿去廢紙回收都可賣十元，不過其中一份日日都係咁薄，過多幾個月唔知仲出唔出。
　　最怕就係扮清高講性格，一出就話正能量，大佬，知唔知正能量講得唔好好易講成「正　樣」。新聞到底甚麼才是正面，甚麼才是負面，一如銅板的兩面，在乎你點睇，千祈唔好自作聰明，替讀者作選擇。
　　上星期五（八月十九日），AM730頭版訪問了甘浩望神父，甘浩望譜新曲 諷政府唔幫窮人（2011年08月19日）：「雖然他近十年專注內地服務，但仍心繫本港邊緣的一群，斥責『政府政策唔係幫窮人』，並將滿腔憤慨譜成樂韻《The Poor》，以曲抒情，諷刺最低工資打爛窮人飯碗，內地孕婦政策鼓勵窮人墮胎。」往事如煙，今天已沒有多少人提起曾經絕食抗議的甘浩望。
　　當份份大報為某人結婚離婚放頭版，中央要員富商講話慌死無人知的年代，AM730竟然將甘浩望新聞重點報道，單是這一點，日日早起排隊攞一份都係值得。
　　無論政見如何贊成與否，報紙應該這樣作報道，不因惡行橫行而有所忌諱。