悲哀

  如果一個女生約了一個男生六時在崇光百貨見面，而過了六時十五分，男生仍未出現，哪女生會怎樣？
　　看過《天使愛美麗》都知大概會如此，可惜自從有了智能電話，甚麼幻想也沒有了，特別在特區香港，再沒有機會胡思亂想了。現在大概會是這樣……
　　約五時三十分，女生電話響起，傳來男生的聲音：「剛剛上了72號巴士，應該六點鐘會到。」
　　過了十五分鐘，電話又響起，當然又是男生的聲音：「弊喇，香港仔隧道超塞車，唔知趕唔趕切……」
　　六時了，女生正在崇光化妝櫃檯試唇膏，電話又響，都係男生：「死啦，勁塞車，仲未出隧道，唔好嬲，等多一陣……」
　　無你咁好氣，都已經六時十五分，女生買完唇膏試胭脂，剛想搽勻，電話震到搽唔勻（因為改了震機），有點氣，正想開聲，那邊男生：「唉，好啦，終於出咗隧道，就快到……」
　　遲到好過無到，有甚麼要緊，都已經六時三十四分，女生繼續試香水，電話又震，令香水噴多一噴，一聽電話：「剛剛落車，你係邊……」
　　「你到就到，唔到就唔到，唔使每隔十分鐘打個電話報到……」



　　特區香港實在太細，再加一個手提電話，所有幻想都無埋，怪不得連常識都沒有。
　　台灣地方大一點，有城市有郊區有鎮有縣有鄉村之分，所以還有談情說愛的電影歌曲故事，更有胡思亂想的空間，如果沒有這些，何來浪漫？
　　當一個地方，無論從說話到依靠，都跟隨大家長，連哼一聲都不敢，由上而下，幻想早沒有，遑論虛想，所以電影無希望，電視如死水，廣告唔使講，歌曲學人唱，創作只會抄，傳媒全跪低……咁嘅地方，有咁嘅自由，卻不懂利用，真係悲哀。