麵包

　　早上醒來，大把功夫要做，想做完每一項，必要訂好計劃。
　　焗麵包時間最長，但又不能排在最頭，因為事前要準備，事後要清理，所以先收拾待洗衣服床單放進洗衣機，洗落後搬齊架生，準備焗麵包。
　　見時間尚早，於是決定焗一個最大號的牛油鮮奶包，單是麵粉已經六百克，配半塊牛油，如果依照指示要用一百多克牛油，為怕牛油太多影響健康，已經減少了三分之一，糖也一樣，只是淡一些，自己吃也沒有所謂。
　　鮮奶要三百毫升，一盒都唔夠。初時唔明白，做麵包點解要落鹽，後來想想鹽可能令麵粉味道產生變化，起中和作用，至於酵母可唔可以落少，真係未試過，或者多味道會帶苦，少則發唔起。
　　按掣後開始其他工作，又晾衫又換床單又洗碗等，話咁快已經三個多小時，洗緊廁所之時個麵包機呱呱叫，立刻洗手關掉大掣，從爐中取出一個大肥包。
　　倒了出來放在檯中任由攤凍，繼續清潔家居。唔做唔知，做起來都幾吃力，不是怕辛苦，而係唔夠熟手。做的時候想起現在已經幸運得多，起碼工具清潔劑多，用舊即棄，較易清理，不像從前，沒有地拖用地布，係要彎腰趴來做，以前父母天天做，如今才做一天，又怎能說辛苦。
　　來到最後，睇番個包，發成咁大個，唔怪得要用成斤麵粉，可能有牛油鮮奶，麵包皮稍過了少少火位，下次可改為輕火。切開時陣陣牛油加奶味，未食先醉，吃了黏在攪拌頁的麵包碎，有甚麼比做完功夫嘆片包（碎）來得滿足？因為好嘢留待消夜才食。