外國勢力

　　上兩個月成日聽到勾結外國勢力，連特區香港的施政報告都講外國勢力，但究竟何謂「外國勢力」？特區政府當然唔會講，就算講都會係適當時候。
　　又會有人問何謂「適當時候」？適當時候就係適當時候，只有佢知我哋永遠唔會知，所以唔好問咁多。你唔講又唔可以問，吾等愚民自然多聯想兼亂咁估，「外國勢力」係指邊個呢？
　　誰料係一月中，睇新聞睇到法律年度開啟禮 首席法官、律政司、律師代表齊論法治這則時，一見特區官員律政司張相，似乎立刻明白何謂外國勢力。
　　曾經係電視上睇直播，包括審四人幫即江青、姚文元、張春橋、王洪文和早前審唱紅打黑的薄熙來、王立軍等，坐在法庭中間的那個人不叫法官，中國稱為「審判長」，穿一件類似毛裝的衣服，聽聞同是長袍，近年中間多了一條紅帶。
　　但只要細心一睇，特區香港法官所穿的稱為長袍，因為罩在身，但中國的只可稱為長褸，中間有鈕，袍與褸是分別的。
　　穿長袍好著長褸好，都唔緊要，但一睇律政司個頭，唔使講一定係外國勢力，有無人見過中國法官（應該係審判長）戴個假髮上庭？戴假髮只有英國和英聯邦國家的法官和律師。
　　咁佢仲唔係外國勢力？