日記

一月二十九日晚上
　　正在掃地清潔，聽到剛才有線電視唔知預告咗會訪問一個人，但聽唔到係邊個，見一大班原本坐定定埋頭苦幹的高級知識份子立刻興高采烈，議論紛紛，低頭竊笑，點解會咁呢？唔通一陣訪問財爺，話農曆新年前每人派五萬，只要有三粒星身份證個個都有份，所以咁高興。
　　暫時唔好理咁多，都係專心掃地倒垃圾，唔係指定時間內搞唔掂，上司以為蛇王偷懶，等一陣仲要去茶水房執拾。都唔知點解，話晒出外做緊嘢嗰班人，個個都讀過吓書，接受過高等教育，外表一派斯文，寫文章字字珠璣，出口成文，一副中產階級的模樣，但只要一入茶水部見到個星盆，以為去咗非洲叢林的垃圾堆，茶葉大堆有之，茶包幾個有之，麵碎有之，飯粒有之，薯仔蘿蔔番茄碎有之，還有不知何物有之，全部倒在裏面，以為可以經星盆的去水渠一沖了之。
　　明明秘書處已經在星盆之上貼了一張告示，大大隻字寫明「請勿將渣滓倒入星盆」，旁邊更設有渣滓桶，照計無理由睇唔到，唔通佢哋唔識字？也沒有可能，唯一合理解釋，就係唔識睇中文。
　　沉思之時，突然外面傳來嘈吵聲，一大班人將電視聲音開到最大，幾十人圍住睇部電視，以為發生咩大事，原來訪問開始。
　　究竟訪問邊個咁緊張？可惜成班人圍住根本睇唔到，但係聽到，知道係個女的，每當把女聲講一句英文，班人就大笑大叫，跟住又講幾句英文，班人歡呼到又叫又笑，簡直情緒高漲，好像終於期待自己的偶像出現一樣。
　　十多分鐘後，終於在歡呼聲笑聲叫聲哀嚎聲中結束了訪問，要分清楚，歡呼聲笑聲叫聲哀嚎聲唔係發自電視機，而係發自圍住看的一大班人，跟著鳥獸散般又回到座位繼續工作。究竟訪問邊個呢？只好問問平日最多聲嘅，佢話係訪問特衰阿頭個女喎。
　　咁佢個女有咩特別？特衰阿頭衰，又唔關個女事，特衰阿頭好，都唔關個女事，點解訪個女好似訪問大明星一樣，令個個著迷人人要睇？唔通真係以為「名人」個女就會特別啲？的確莫名奇妙，心中納悶，更加唔明。
　　入返廚房倒垃圾，唔知點解這裏垃圾特別多就真，剛巧碰到球仔，於是和他說起剛才訪問特衰阿頭個女，點知佢驚晒即刻話：「佢個女關我叉事！」