好日

　　經常聽到有人問邊日係好日，從來都唔多相信，所以一直沒有留意。

　　忙於工作時，電話來問「幾時收爐幾時開工」。生活在現代化物質豐富兼城市化社會，唔係一切按勞工假或公眾假期休息作業的嗎？兼在南區工作，這裏也跟隨歐美文明國家一句名言「Almost open, Some time close.」的宗旨與工作態度，為何每逢這些日子，必然有些人特別興奮問長問短。

　　早在年輕初出來工作時，某人結婚說了那天擺酒，另一個隨口問「那天是好日？」誰料某人立刻答「我結婚那天當然是好日」。

　　過了幾年轉了工作環境，又聽到幾位大學畢業的高級知識分子問「哪日是好日？」這無聊問題時，今次輪到坐在詢問處的保安搶住回答：「日日都係好日。」

　　今天臨近收工時又聽到有人問邊日開工係好日，主席話初五呀初八呀甚至十一都係好日，某位扮富貴的偽富婆答：「我年年都係初八開工。」結果幾個人七嘴八舌討論著，又話睇通勝又話問過神婆，而自己則無你咁好氣聽住歌扮不存在。

　　熱鬧的氣氛終於被一個人打破，大大聲「通勝同神婆話初五半夜兩點鐘好日兼好時晨呀，咁你返唔返嚟開工呀？」咁樣嚟問個扮富貴嘅偽富婆。

　　之後係點唔多清楚，因為趕住寫篇日記填滿空白，只係想知好日故然要開工，咁唔好日係咪唔使做兼有糧出？